އުފަންވިއިރުވެސް ބޮލާއި ބޮލުން ގުޅިފައިވާ މިސުރުގެ އެއްމާބަނޑު އެއްސިފައެއްގެ ދެކުދިން 17 ގަޑިއިރުގެ އޮޕަރޭޝަނަކަށްފަހު ވަކިކޮށްފިއެވެ.

މިދިއަ ބުދަދުވަހު ކުރި މިއޮޕަރޭޝަންގެ އިސް ޑޮކްޓަރެއްގެ ގޮތުން ހަރަކާތްތެރިވީ ޑޮކްޓަރ ޢަބްދުﷲ އައްރަބީއާއެވެ. އޭނާގެ އޮޕްރޭޝަން ޓީމުގައި 31 މީހުން ހަރަކާތްތެރިވިއެވެ. މީގެ ތެރޭގައި އޮޕަރޭޝަން ޑޮކްޓަރުންނާއި ކޮންސަލްޓެންޓުންނާއި ޚާއްޞަ ޑޮކްޓަރުންނާއި ނަރުހުންނާއި ޓެކްނިކަލް ކަންތައްތަކުގައި އެހީތެރިވާ ފަރާތްތައް ހިމެނެއެވެ.

ސަޢުދީ ޢަރަބިއްޔާގައި ކުރި މި އޮޕަރޭޝަން ކުރީ ސަޢުދީގެ އެންމެ އިސް ވެރިންގެ އެންގެވުމަކަށްކަމަށް ޑޮކްޓަރ އައްރަބީއާ ވިދާޅުވިއެވެ.

ޖިސްމުން ގުޅިފައިވާ ނިބޫކުދިން ވަކިކުރުމަށް ސަޢުދީން ހިންގާ ޕްރޮގްރާމުގެ ދަށުން، މިއީ މިހާތަނަށް ކުރެވުނު 57 ވަނަ އޮޕަރޭޝަންކަމަށް ސަޢުދީގެޒެޓް ނޫހުން ބުނެފައިވެއެވެ. މި ޕްރޮގްރާމުގެ ދަށުން، ފާއިތުވި 33 އަހަރު ދުވަހުގެ ތެރޭގައި 130 ކުދިން އޮޕަރޭޝަންކޮށްގެން ވަކިކުރެވިފައިވާކަމަށް އައްރަބީއާ ވިދާޅުވިއެވެ. މިކުދިންނަކީ އުޚުއްވަތްތެރި، ރަޙްމަތްތެރި 23 ގައުމެއްގެ ކުދިންކަމަށް އޭނާ ވިދާޅުވިއެވެ.