ކުރިޔާލާ ވިޒާހޯދަންނުޖެހޭ ސިޔާސަތަށް އިންޑޮނީޝިއާއިން ބަދަލުގެނެސްފިއެވެ.

އަލަށް ހިންގަން ފެށި ގަވާޢިދުގެ ދަށުން ، އިންޑޮނީޝިއާގެ އިމުގެ ތެރެއަށް ވަނުމަށް ( ބޯޑަރުން އެތެރެވާން ) 159 ގައުމަކުން ކުރިޔާލާ ހުއްދަ ، ވިޒާ ، ހޯދަންޖެހޭނެއެވެ.

އިންޑޮނީޝިއާގެ މިއާސިޔާސަތުގެ ދަށުން ކުރިޔާލާ ވިޒާ ހޯދަންނުޖެހޭ އޮތީ ވަރަށް މަދުގައުމެކެވެ. އެއީ އާސިއާންގެ ގައުމުތައްކަމަށްވާ ބުރުނައި، ފިލިޕީންސް، ކެމްބޯޑިއާ ، ލާއޯސް، މެލޭޝިއާ ، މިޔަންމާ ، ސިންގަޕޯރ ، ތައިލޭންޑް، ޓީމޯ ލެސްޓެ އަދި ވިއެޓްނާމެވެ.

ވިޒާއާއި ނުލާ ގިނަ ގައުމުތަކެއްގެ ދަތުރުވެރިންނަށް އިންޑޮނީޝިއާއަށް ވަދެވޭ ގޮތަށް އޮތް އޮތުން މަޑުޖައްސާލުމުގެ އަމުރު ނެރެފައިވަނީ އެގައުމުގެ، ގާނޫނާއި އިންސާނީ ޙައްގުތަކާއިބެހޭ ވުޒާރާއިންނެވެ.

ބާލީ ޓައިމްސް ނޫހުން ރިޕޯޓުކުރި ގޮތުގައި މިސިޔާސަތަށް ބަދަލުގެނެސްފައިމިވަނީ، ޢާންމު މަސްލަހަތަށް އަންނަ ލޮޅުންތައް ހައްލުކުރުމަށާއި ގައިންގަޔަށް އަރާ ބަލިތަކުން ސަލާމަތްވެފައިވާ ގައުމެއްކަން ދުނިޔޭގެ ޞިއްޙަތު ޖަމްޢިއްޔާއިން ޔަގީންކޮށްދީފައިނުވާ ގައުމުތަކުން އަންނަ ނުރައްކާތަކުން އިންޑޮނީޝިއާގެ ރައްޔިތުން ސަލާމަތްކޮށްދިނުމަށެވެ.

އިންޑޮނީޝިއާއަށް އެތެރެވުމުގެ ކުރިން ވިޒާ ހޯދަންޖެހޭ 159 ގައުމުގެ ތެރޭގައި ދިވެހިރާއްޖެވެސް ހިމެނޭކަމަށް އިންޑޮނީޝިއާގެ ކޮމްޕަސް ނޫހުން ބުނެފައިވެއެވެ.