އިންޑިއާގެ ޑިޖިޓަލް އިގްތިޞާދު ވަރުގަދަކުރުމަށްޓަކައި އިންޑިއާގައި 25 ބިލިއަން ޑޮލަރު އިންވެސްޓްކުރަން އެމެރިކާގެ ގޫގުލްއާއި އެމޭޒަން ކުންފުނިން ނިންމައިފިއެވެ.

ރަސްމީ ދަތުރުފުޅެއްގައި މިދިޔަ ހަފުތާގެ ބުދައިން އިއްޔެއާއި ހަމަޔަށް، އެމެރިކާއަށް ވަޑައިގެން އުޅުއްވި އިންޑިއާގެ ބޮޑުވަޒީރު ނަރެންދުރަ މޯދީއާއި އެމެރިކާގެ ވެރިރަށް ވޮޝިންޓަން ޑީ.ސީގައި ބައްދަލުކުރަށްވަވާ، ގޫގުލް ކުންފުނިން އިންޑިއާގައި 10 ބިލިއަން ޑޮލަރު އިންވެސްޓްކުރަން ނިންމާފައިވާ ވާހަކަ، ގޫގުލްގެ ސީ.އީ.އޯ ސުންދަރު ޕިޗާއީ، މޯދީ އަރިއަހުގައި ވިދާޅުވިއެވެ.

މީގެ އިތުރުން ، އިންޑިއާގެ ގުޖްރާތުގައި ފިންޓެކް ، އިންޓަރނެޓް މެދުވެރިކޮށް މާލީ ޚިދުމަތްތައްދޭ ، މަރުކަޒެއް ގޫގުލް ކުންފުނިން ގާއިމުކުރާނެ ވާހަކަވެސް ޕިޗާއީވަނީ މޯދީ އަރިއަހުގައި ވިދާޅުވެފައެވެ.

ހަމަ، މޯދީގެ މިދަތުރުފުޅުގައި، މޯދީއާއި ބައްދަލުކުރަށްވަވާ، އެމެރިކާގެ އެމޭޒަން ކުންފުނީގެ ރައީސް އަދި ސީ.އީ.އޯ އެންޑްރޫ އާރ. ޖޭސީވަނީ އިންޑިއާއާއެކު ބައިވެރިވެގެން ކުރެވިދާނެ ކަންތައްތަކެއްގެ ވާހަކަ ދައްކަވާފައެވެ. މި ބައްދަލުވުމުގައި، އެމޭޒަން ކުންފުނިން އިންޑިއާގައި މިހާރު ކޮށްފައިވާ އިންވެސްޓްމަންޓްތަކުގެ އިތުރުން 15 ބިލިއަން ޑޮލަރު އިންވެސްޓްކޮށް ، އެކު ޖުމުލަ 26 ބިލިއަން ޑޮލަރަށް އެމޭޒަންގެ އިންވެސްޓްމެންޓް މަތިކުރަށްވާނެ ވާހަކަ ޖޭސީ ވިދާޅުވިއެވެ.

ރިޕޯޓުތައް ބުނާ ގޮތުން މިއިންވެސްޓްމަންޓްތަކުގެ ސަބަބުން އިންޑިއާގެ އިގްތިޞާދުގައި ޒަމާނީ ޓެކްނޮލޮޖީ ކުޅޭ ދައުރު މިހަރާށްވުރެ މާބޮޑަށް އިތުރުވެ ، ދުނިޔޭގެ އީޖާދީ އަދި ބަދަލުގެ ނާރެހަކަށް ، އިންޑިއާ ބަދަލުވެގެން ދާނެއެވެ.