އިސްރާއީލުން ހިފާފައިވާ ފަލަސްޠީނުގެ ހުޅަނގު އައްސޭރީގެ ބިންތަކުގައި ބައިނަލްއަގްވާމީ ގާނޫނާއި ޚިލާފަށް އެތައްހާސް ބަޔަކު ވަޒަންވެރިކުރަން އިސްރާއީލުގެ ހައްދުފަހަނައަޅާފައިވާ ކަނާތުުފިޔައިގެ ސަރުކާރުން ނިންމައިފިއެވެ.

މިކަމަކީ ފަލަސްޠީނީންނާއި ދެކޮޅަށް އިސްރާއީލުން ކުރާ ނިމުމެއްނެތ، ހުޅުވިފައިވާ ހަނގުރާމައެއްގެ ގޮތުގައި ފަލަސްޠީނުގެ އޮފިޝަލަކު ސިފަކުރެއްވިއެވެ.

މިނިންމުމެއް އިސްރާއީލުގެ ސަރުކާރުން މިނިންމީ ހުޅަނގު އައްސޭރީގައި މެދުކެނޑުމެއްނެތި އިސްރާއިލުން ހިންގަމުންގެންދާ ޢުދުވާނީ ހަރަކާތްތަކާއި އިސްރާއީލުގެ ރައްޔިތުން ފަލަސްޠީނުގެ ބިންތަކުގައި ވަޒަންވެރިކުރުވުމަށް އިސްރާއީލުން ގެންގުޅޭ ސިޔާސަތުތަކަށް އެމެރިކާއިންވެސް ފާޑުކިޔަމުންދަނިކޮށެވެ.

ހިފާފައިވާ ބިންތަކުގައި ފަސްހާސް ގެއެޅުމަށް އިސްރާއީލުގެ ދިފާޢީ ވުޒާރާގެ ޕްލޭނިންގް ކޮމިޓީއިން ނިންމީ މިދިޔަ ހޯމަ ދުވަހުއެވެ. މިމަސައްކަތް ހިނގާނުހިނގާ ގޮތްވެސް ބަލާނީ މިޕްލޭނިންގް ކޮމިޓީއިންނެވެ. މިގެތަށް އެޅުމުގެ ޢަމަލީ މަސައްކަތް ފަށާނެ އިރެއް، ދުވަހެއް، އިސްރާއީލުގެ ދިފާޢީ ވުޒާރާއިން ހާމަކޮށްފައެއް ނުވެއެވެ.

މިހާތަނަށް އައިއިރު އިސްރާއީލުން 1967 ގައި ހިފާފައިވާ ފަލަސްޠީނުގެ ހުޅަނގު އައްސޭރީގައި ހަތް ލައްކަ އިސްރާއީލީން ވަޒަންވެރިކޮށްފައިވެއެވެ. ބައިނަލްއަގްވާމީ މުޖުތަމަޢުން ގަބޫލުކުރާ ގޮތުގައި މިބިންތަކުގައި އިސްރާއީލުގެ ރައްޔިތުން ވަޒަންވެރިކުރުވަން ހިންގާ ޢުމްރާނީ މަސައްކަތްތައް ހިންގުމަކީ ޣައިރުގާނޫނީ ކަމެކެވެ އަދި ޞުލްޙަޔަށް އޮތް ވަރުގަދަ ހުރަހެކެވެ.

"ފަލަސްޠީނުގެ ރައްޔިތުންނާއި ދެކޮޅަށް ނަޓަންޔާހޫގެ ސަރުކާރުން އެކުރަނީ ޢުދުވާނީ ހަނގުރާމަޔެއް" ހުޅަނގު އައްސޭރީގައި އުޅުއްވާ ފަލަސްޠީނުގެ އޮފިޝަލެއްކަމަށްވާ ވާސިލް އަބޫ ޔޫސުފް ވިދާޅުވިއެވެ.