މަޝްހޫރު ބިލިއަނަރ ރިޗަރޑް ބްރޭންސަންގެ ސްޕޭސް ކުންފުނި، ވަރޖިން ގެލެކްޓިކްސްއިން ޖައްވަށް ދަތުރުކުރާ ކޮމަރޝަލް ފްލައިޓްތައް ފަށައިފިއެވެ.

ވިހި އަހަރުގެ ދިގު އިންތިޒާރަކަށްފަހު ކޮމަރޝަލް ފްލައިޓްތައް ފެށުމަށް ވަރޖިން ގެލެކްޓިކްސްގެ ޖައްވަށް ދަތުރުކުރާ ހާއްސަ އުޅަނދު 'ޔުނިޓީ' ބުރާސްފަތި ދުވަހު ވަނީ ނިއު މެކްސިކޯގެ ވައިގެ ތެރެއަށް ތިން ފަސިންޖަރަކު ގޮވައިގެން ދަތުރުކޮށްފައެވެ. މި ދަތުރުގެ މައިގަނޑު އަމާޒަކީ ވެއިޓްލެސް ސައިންސް އެކްސްޕެރިމަންޓެއް ކުރުމެވެ.

މިއީ ޓެސްޓު ފްލައިޓުތަކަށްފަހު ވަރޖިން ގެލެކްޓިކްސް އިން ފުރަތަމަ ފަހަރަަށް ކުރި ކޮމަރޝަލް ދަތުރެވެ.

ރިޕޯޓުތައް ބުނާގޮތުން ސްޕޭސް ޓުއަރިޒަމް ނުވަތަ ޖައްވުގައި ފަތުވެރިކަން ތައާރަފްކޮށް ބިލިއަނަރ ރިޗަރޑް ބްރޭންސަންގެ ސްޕޭސް ކުންފުނީގެ ޖައްވަށް ދަތުރުކުރާ ރޮކެޓުން ދަތުރު ކުރުމަށް 800 އަށްވުރެއް ގިނަމީހުން ވަނީ ޓިކެޓް ގަނެފައެވެ.

ވާޖިން ގެލެކްޓިކްސް އިން ޓިކެޓް ގަނެފައިވާ ގިނަ ފަރާތްތަކެއް ޖައްވަށް ދަތުރު ކުރުމުގެ އިންތިޒާރުގައި ދިހަ އަހަރަށް ވުރެ ގިނަ ދުވަހު ހޭދަ ކޮށްފައިވެއެވެ. އަދި ގިނަ ބަޔަކަށް އަދިވެސް ދިގު އިންތިޒާރެއް ކުރަން މަޖުބޫރުވާނެކަމަށް ރިޕޯޓުތައް ބުނެއެވެ.

ޓިކެޓް ގަނެފައިވާ ގިނަބަޔަކު ޖައްވަށް ދިއުމަށް ދިގު އިންތިޒާރެއް އަދިވެސް ކުރަން ޖެހެނީ ވާޖިން ގެލެކްޓިކްސްގެ ޔުނިޓީގައި އެއްފަހަރާ އުފުލޭ ފަސިންޖަރުންގެ އަދަދު މަދުވުމުންނެވެ. އަދި ޔުނިޓީގެ ދަތުރުތައް ރާވާފައިވަނީ މަހަކު އެއް އައުޓިންް މިޝަން ކުރިއަށް ގެންދިއުމަށްކަމަށް ރިޕޯޓުތައް ބުނެއެވެ.

ވާޖިން ގެލެކްޓިކްސްގެ ފްލައިޓް ޓިކެޓެއް ވިއްކަމުންދަނީ ގާތްގަނޑަކަށް 450،000 ޑޮލަރަށެވެ.