މިދިޔަ ފެބްރުއަރީ މަހު އެމެރިކާގެ އެލެސްކާއިން ފެށިގެން އެމެރިކާގެ އިރުމަތީ އައްސޭރިޔަށް ދަތުރުކުރި ޗައިނާގެ ފުއްޕާހަމުން (ބެލޫން) އެއްވެސް ޖާސޫސީ މަޢުލޫމާތެއް އެއްކޮށްފައިނުވާކަމަށް އެމެރިކާގެ ދިފާޢީ ވުޒާރާ ، ޕެންޓަގަނުން ބުނެފިއެވެ.

އެމެރިކާއިން މިފުއްޕާހަމަށް ހަމަލާދީ ، ވައްޓާލުމަށްފަހު ، ހޯދާފައިވާ އޭގެ ބައިތައް ތަޙްލީލުކުރަމުންދާކަމަށް މިދިޔަ ބުރާސްފަތި ދުވަހު އެމެރިކާގެ ދިފާޢީ ވުޒާރާގެ އޮފިޝަލުން ވިދާޅުވެފައިވެއެވެ.

އެމެރިކާއާއި ޗައިނާއާއި ދެމެދު އޮތް ދޭދޭ ގުޅުމަށް ބުރޫއެރިކަމަކަށް މިފުއްޕާހަމުގެ ކަންތައް ވެގެންދިޔައެވެ.

މިދިޔަ ބުރާސްފަތި ދުވަހު ، ޕެންޓަގަންގެ ތަރުޖަމާނު ބްރިގޭޑިއަރ ޖެނެރަލް ޕެޓް ރައިޑަރ ވިދާޅުވިގޮތުގައި ، ޗައިނާގެ މިފުއްޕާހަމަށް ޖާސޫސީ މަޢުލޫމާތު އެއްކުރުމުގެ ގާބިލުކަން ލިބިފައިފައިވާކަން އެމެރިކާއަށްވަނީ އެނގިފައެވެ.

ނަމަވެސް ، ޖެނެރަލް ރައިޑަރް ވިދާޅުވި ގޮތުގައި މިފުއްޕާހަން އެމެރިކާ މަތިން އުދުހުނުއިރު އެއްވެސް ޖާސޫސީ މަޢުލޫމާތެއް އެއްކޮށްފައެއްނުވެއެވެ. އޭނާ އިތުރަށް ވިދާޅުވި ގޮތުގައި މިފުއްޕާހަމަށް ޖާސޫސީ މަޢުލޫމާތު އެއްކުރެވިފައިނުވަނީ ، އެކަމާއި ދެކޮޅަށް އެމެރިކާއިން އެޅި ފިޔަވަޅުތަކުގެ ސަބަބުންނެވެ.

ޗައިނާގެ އޮފިޝަލުން އޭރުވެސް މިހާރުވެސް ބުނަމުންދަނީ މިފުއްޕާހަމަކީ މޫސުމީ މަޢުލޫމާތު އެއްކުރުމަށް އުދުއްސާލެވުނު އަދި ފަހުން މަގުން ކައްސާލައިގެން އެމެރިކާ ބައްރަށް ދިޔަ ފުއްޕާހަމެއް ކަމަށެވެ.