މިދިޔަ ގަރުނުގެ ކުރީކޮޅު މަރުވެފައިވާ ، އޮސްޓްރިއާގެ މަޝްހޫރު ކުރެހުންތެރިޔާ ގުސްތާވް ކްލިމްޓް، މަރުވުމުގެ ކުރިން އޭނާ އެންމެ ފަހުން ކުރެހި ކުރެހުން، ޕޯޓްރެއިޓް, ޔޫރަޕުގެ ރިކޯޑު އަގަކަށް ވިކިއްޖެއެވެ.

މިކުރެހުން ލަންޑަނުގެ ނީލަމުގައި ވިއްކާލާފައިވަނީ 104.4 މިލިއަން ޑޮލަރަށެވެ. މިކުރެހުން ވިއްކާލި ސޮދެބީޒުން ބުނި ގޮތުގައި ރިކޯޑު އަގަކަށް ވިއްކާލި ކުރެހުމަކީ " ލޭޑީ ވިތް އަ ފޭން (އަތުފަންކާއެއް ހިއްޕަވައިގެން ހުންނެވި ކަމަނާ) އެވެ".

ނީލަންކިޔުމުގެ ވިޔަފާރިކުރާ ސޮދެބީޒްގެ ޗެއާޕާސަން ހެލީނާ ނިއުމަން ބުނި ގޮތުގައި މި ކުރެހުމަކީ ގުސްތާވްގެ ހުނަރުގެ މަތިވެރިކަން ދައްކައިދޭ ކުރެހުމެކެވެ. އަދި އެހެންމެ މިކުރެހުން ދުށް ކޮންމެ މީހެއްގެ ޚިޔާލާއި ފިކުރު މިކުރެހުމުގައި ހައްޔަރުވެގެންދާކަމަށް ހެލީނާ ބުންޏެވެ.



"މިކުރެހުން ގަތުމަށް އުފެދިފައިވާ ޖޯޝާއި ފޯރި ، ލަންޑަނުން މިރޭ ފެނިގެން ދިޔުންވީ ، އަހަރެންނަށް ލިބުނު ފަޚުރެއްކަމުގައި ، ޝަރަފެއްކަމުގައި. މިކުރެހުމުގެ އަގު ކަނޑައަޅާ ނީލަން ނިންމާލަން ލިބުނު ފުރުޞަތަކީ ، ހަމަ ލިބުނު އެހާމެ ބޮޑު ފަޚުރެއް އަދި ޝަރަފެއް" ، ހެލީނާ ނިއުމަން ބުނެފައިވެއެވެ.

ސޮދެބީޒުން ބުނި ގޮތުގައި ދިހަ މިނެޓަށް ދެމިގެން ދިޔަ މިކުރެހުމުގެ ނީލަމުގައި ބައިވެރިވީ ހަތަރު ފަރާތަކުންނެވެ. އަދި ނީލަމުގެ ވާދަ ނިމި ، ކުރެހުން ގަނެފައިވަނީ ހޮންގްކޮންގް މީހެކެވެ.