މި އަހަރުގެ ޙައްޖުގެ މަތިވެރި އަޅުކަން އަދާކުރުމަށް ރާއްޖެއިން ސަޢުދީ ޢަރަބިއްޔާއަށްދިޔަ ޙައްޖާޖީން ރާއްޖެ އަންނަން ފަށައިފިކަމަށް އިސްލާމިކް މިނިސްޓްރީން ހާމަކޮށްފިއެވެ.

އިސްލާމިކް މިނިސްޓްރީން މިއަދު ބުނީ ޙައްޖުގެ މަތިވެރި އަޅުކަން ނިންމުމަށްފަހު، ދިވެހި ޙައްޖުވެރިންގެ ފުރަތަމަ ގްރޫޕް މިއަދު ރާއްޖެއަށް އައިސްފައިވާ ކަމަށެވެ. ރާއްޖެއައި ފުރަތަމަ ގްރޫޕްގައި ހިމެނެނީ އަލް މަނާސިކް ޕްރައިވެޓް ލިމިޓެޑްގެ ހަވާލުގައި ޙައްޖަށްދިޔަ ޙައްޖުވެރިންނެވެ.

އިސްލާމިކް މިނިސްޓްރީން ބުނީ 1444 ވަނަ އަހަރު ޙައްޖުގެ މަތިވެރި އަޅުކަން ނިންމުމަށްފަހު ރާއްޖެ އައުމަށްޓަކައި 2ވަނަ ގްރޫޕްވެސް މިހާރު ފުރާފައިވާކަމަށެވެ. ދެވަނަ ގްރޫޕްގައި ހިމެނެނީ މޯލްޑިވްސް ޙައްޖު ކޯޕަރޭޝަން ލިމިޓެޑްގެ ހަވާލުގައި ޙައްޖަށްދިޔަ ޙައްޖުވެރިންނެވެ.

މިއަހަރު ރާއްޖެއިން ޙައްޖަށްދިޔަ ދިވެހި ޙައްޖާޖީން މިއަދުން ފެށިގެން ރާއްޖެއަށް އަންނަން ފަށާފައިވާއިރު ހައްޖުވެރިން އައުމަށް ހަމަޖެހިފައިވަނީ ޖުމުލަ 6 ފްލައިޓެއްގައެވެ.

ޙައްޖާޖީން އަންނަ 3 ވަނަ ފްލައިޓު އޮތީ ޖުލައި 10ވަނަ ދުވަހުއެވެ. އެ ފްލައިޓުން އަންނާނީ ޙައްޖު ކޯރޕަރޭޝަންގެ ޙަވާލުގައި ދިޔަ ޙައްޖާޖީންގެ ގްރޫޕެކެވެ. ޖުލައި 11 ވަނަ ދުވަހު ސިސިލްފަރު ޙައްޖު އެންޑް ޢުމްރާ ގުރޫޕު އަދި ޖުލައި 12ވަނަ ދުވަހު އަލްޙަރަމައިން ޙައްޖު އެންޑް ޢުމްރާ ގުރޫޕުގެ ޙަވާލުގައި ދިޔަ ހައްޖާޖީން އައުމަށް ހަމަޖެހިފައިވާކަމަށް އިސްލާމިކް މިނިސްޓްރީން މަޢުލޫމާތު ދެއެވެ.

ދިވެހި ޙައްޖާޖީން އަންނަ އެންމެ ފަހު ފްލައިޓު އޮތީ ޖުލައި 14 ވަނަ ދުވަހުއެވެ. އެ ދުވަހު އަންނާނީ ޙައްޖު ކޯރޕަރޭޝަންގެ ޙަވާލުގައިދިޔަ ޙައްޖުވެރިންގެ އެންމެ ފަހު ގްރޫޕެވެ.

މިއަހަރު ރާއްޖެއިން ޙައްޖުވުމަށް ސަޢުދީއަށްދިޔަ ޙައްޖާޖީންގެ ތެރެއިން 4 މީހަކު ވަނީ ނިޔާވެފައެވެ.