މާލެ ސަރަހައްދުގެ މިސްކިތްތަކުގައި ހުކުރު ނަމާދުކުރުން ހުއްޓާލިތާ ތިން މަސް ފަހުން މާދަމާ އިން ފެށިގެން ހުކުރު ނަމާދު ކުރަން އިސްލާމިކް މިނިސްޓްރީން ދެންމެ ނިންމައިފި އެވެ.

ކޯވިޑް-19 އާއި ގުޅިގެން، މާލެ ސަރަހައްދުގެ މިސްކިތްތަކުގައި ޖަމާއަތުގެ ނަމާދު ކުރުން މެދު ކަނޑާލީ، މާރޗު މަހުގެ 18 ވަނަ ދުވަހުގެ ޢަޞުރު ނަމާދު ވަގުތުން ފެށިގެންނެވެ. އަދި 15 އޭޕްރީލްގައި މާލެއިން ކޯވިޑް-19 ގެ ޕޮޒިޓިވް ކޭސްތައް ފެންނަން ފެށުމާއި އެކު މިސްކިތްތައް މާލޭގެ މިސްކިތްތައް ވަނީ ބަންދުކޮށްފައެވެ.

10 ޖުލައި 2020 ވާ ހުކުރު ދުވަހުން ފެށިގެން މާލެ ސަރަޙައްދުގެ މިސްކިތްތަކުގައި ހުކުރު ނަމާދު ކުރުން ކުރިއަށްދާނެ ވާހަކަ ދަންނަވަމެވެ.#MVIaffairs

— Ministry of Islamic Affairs (@MVIaffairs) July 9, 2020

އޭގެ ފަހުން މާލޭގައި އިޢުލާންކޮށްފައިވާ ފުރަބަންދަށް ދިން ލުއިތަކާއިއެކު ޖަމާއަތް ނުހަދާ ނަމާދުކުރުމަށް ޖޫން 15 ވަނަ ދުވަހުން ފެށިގެން މިސްކިތްތައް ހުޅުވާލުމަށްފަހު، އަލުން ޖަމާއަތުގައި ނަމާދުކުރަން ފެށީ މިމަހުގެ ފުރަތަމަ ދުވަހުއެވެ.

މާލޭގެ މިސްކިތްތަކުގައި ޖަމާޢަތުގައި ހުކުރު ނަމާދު ކުރުމުގެ ހުއްދަ ދިން ނަމަވެސް، މާދަމާގެ ހުކުރު ނަމާދަށް ދާ ފަރާތްތަކުންވެސް އިސްލާމިކް މިނިސްޓްރީން މިހާރު އާއްމުކޮށްފައިވާ އުސޫލްތަކަށް އަމަލުކުރުމަށް އެ މިނިސްޓްރީން ވަނީ އެދިފައެވެ. އެގޮތުން ގެއިން ވުޟޫ ކޮށްގެން މިސްކިތަށް ދިއުމާއި، ވަކި މުސައްލައެއް ގެންދިއުމާއި، ނަމާދަށް ދާއިރުގައާއި، މިސްކިތުގައި ނަމާދުގައި ތިބޭއިރު މާސްކު އަޅައިގެން ތިބުމަށް ޚާއްސަ ސަމާލުކަމެއް ދިނުމަށް އިސްލާމިކް މިނިސްޓްރީން އިލްތިމާސްކުރެއެވެ.

މީގެ އިތުރުން ފުއްޕާމޭގެ ބަލި ހުންނަ މީހުންނާއި، ރޯގާ ޖެހިފައިވާ މީހުންނާއި، ހުން އައިސްފައިވާ މީހުންނާއި ކެއްސާ މީހުންނާއި ޢުމުރުން ދުވަސް ވެފައިވާ މީހުން މިސްކިތަށް ނުދިއުމާއި، ނަމާދު ނިމުމަށްފަހު މިސްކިތުގައި މަޑު ނުކުރުމަށްވެސް އިސްލާމިކް މިނިސްޓްރީން އެދިފައިވެއެވެ.