ސްރީލަންކާގެ ކަލުޓާރާ އިސްކޫލުގެ ދެފާރެއްގެ ދޭތެރޭ ތާށިވި އަންހެން ކުއްޖަކު ސަލާމަތްކޮށްފިއެވެ. އުމުރުން ހަތް އަހަރުގެ މިމަންޖެ ދެފާރުދޭތެރެއިން ނެރުނީ ކަލުޓާރާ މުނިސިޕަލް ޑިޕާޓްމަންޓުގެ އަލިފާން ނިވާ މީހުންނެވެ.

ކަލުޓާރާގެ ފުލުހުން ބުނި ގޮތުގައި އެދެފާރުގެ ދޭތެރޭގައި އެމަންޖެ ތާށިވެފައި ބައިގަޑިއިރެއްހާއިރު ހުއްޓެވެ. މިއީ އެއިސްކޫލުގެ ދެވަނަ ކިލާހުގައި ކިޔަވަމުންދާ ކުއްޖެއްކަމަށް ފުލުހުން ބުނެއެވެ. މިކުއްޖާ ކިޔަވަންދާ މިއިސްކޫލަށް ކިޔާ ނަމަކީ ކަލުޓާރާ ކަޓުކުރުންޑާ ރޯމަން ކެތޮލިކް ސްކޫލް، އެވެ.

އަލިފާން ނިވާ މީހުންގެ ވެރިޔާ ޕީ. ލަކްޝްމަން ވިދާޅުވި ގޮތުގައި ދެފާރުދޭތެރޭގައި ތާށިވި މަންޖެ ސަލާމަތްކުރީ، ދެފާރު ފޭކޮށްގެންނެވެ. އޭނާ ވިދާޅުވި ގޮތުގައި ދެފާރުދޭތެރޭގައި ތާށިވި މަންޖެގައިގައި ކޫރުމެއްވެސް ނޭޅެއެވެ. ދެފާރުދޭތެރޭގައި ތާށިވުން ނޫން އިތުރުކަމެއް އެމަންޖެޔަށް ނުވާކަމަށް ލަކްޝްމަން ވިދާޅުވިއެވެ.