ރޫސީވިލާތުން ހަނދަށް ފޮނުވި އުޅަނދު ލޫނާ-25، އުދުއްސާލިތާ ފަސް ދުވަސް ފަހުން، ހަނދުގެ ދައުރުވުމުގެ (އޯބިޓްގެ) ތެރެޔަށް ވަދެއްޖެއެވެ.

ރޫސީވިލާތުގެ ފަޒާޔާބެހޭ ދިރާސާތައްކުރާ ރޮސްކޮސްމޯސް އިދާރާއިން އިއްޔެ ބުނި ގޮތުގައި ލޫނާ-25 ހަނދުގެ އޯބިޓަށް ވަދެފައިވަނީ އެއުޅަނދުގައި ހަރުކޮށްފައިވާ ދެއިންޖީނު ހިންގައިގެންނެވެ. އެ ދެއިންޖީނުގެ އެހީގައިއެވެ. ރޮސްކޮސްމޯސް އިދާރާއިން އިތުރަށް ބުނި ގޮތުގައި ލޫނާ-25 އުޅަނދުގެ ހުރިހާ ނިޒާމުތަކެއް އެއްވެސްކަހަލަ މައްސަލައެއްނެތި ބަރާބަރަށް ދަނީ ހިނގަމުންނެވެ.

ލޫނާ-25 އުޅަނދު އުދުއްސާލާފައިވަނީ މިމަހުގެ އެގާރަވަނަ ދުވަހު ރޫސީވިލާތުގެ ވޮސްޓޮޗީ ކޮސްމޮޑްރޯމުންނެވެ (ފަޒާޔަށް ރޮކެޓު އުދުއްސާ ބަނދަރުންނެވެ). މިބަނދަރަކީ ކަޒަކިސްތާނުގެ ބައިކަނޫރު ބަނދަރުގެ ބޭނުންހިފަންޖެހޭ މިންވަރު ކުޑަކުރުމުގެ ގޮތުން މީގެ ހަތް އަހަރު ކުރިން ރޫސީވިލާތުން ބޭނުންކުރަންފެށި ބަނދަރެކެވެ. މިބަނދަރު އޮންނަނީ ރޫސީވިލާތުގެ ދުރުއިރުމަތީގައި ޕެސިފިކް ކަނޑާއި ވަރަށް ކައިރީގައިއެވެ. މިބަނދަރާއި ވެރިރަށް މޮސްކޯއާއި ދެމެދު 5،500 ކިލޯމީޓަތުގެ ދުރުމިނެއް ހުރެއެވެ. ލޫނާ-25 އުޅަނދު އުދުއްސާލާފައިވަނީ ސޮޔުޒް ރޮކެޓެއްގައި ހަރުކޮށްފައިއެވެ.

މިއުޅަނދުން ހަނދުގެ ދެކުނު ދަނޑީގައި ދިރާސާތަކެއްކުރާނެކަމަށް ރޮސްކޮސްމޯސް އިދާރާއިން ބުނެއެވެ. އަދި މިދިރާސާތައްކުރުމަށް އެއްއަހަރު ދުވަސްވާނެކަމަށް އެއިދާރާއިން ބުނެއެވެ. މިއުޅަނދުން ހަނދުގައި ފެނުގެ އަސަރެއްވޭތޯ ބެލުމާއި ފަޒާގެ ދޯދިތައް ދިރާސާކުރުމުގެ މަސައްކަތްކުރާނެއެވެ.

މިއީ 1976 ވަނަ އަހަރަށް ފަހު ރޫސީވިލާތުން ހަނދަށް އުދުއްސާލި ފުރަތަމަ އުޅަނދުކަމަށް ޚަބަރުތައް ބުނެއެވެ.