މަރަށް މަރު ހިފުމަށް ޙުކުމްއިއްވިފައިވާ އެމެރިކާގެ ރައްޔިތަކު ސަޢުދީ ޢަރަބިއްޔާގައި އިއްޔެ ގަތުލުކޮށްފިއެވެ. ސަޢުދީގެ ދާޚިލީ ވުޒާރާއިން ބުނި ގޮތުގައި މަރަށް މަރުހިފުމުގެ ގޮތުން އިއްޔެ ގަތުލުކުރެވުނު މީހާޔަށް ކިޔަނީ ބިޝޮއި ޝަރީފް ނަޖީ ނަސީފްއެވެ.

ނަސީފްގެ ކުށަކީ (ނަސީފްގެ) ބައްޕަގެ ގައިގާ ތަޅާ، އަނިޔާކޮށް ނޭވާހާސްކޮށްލައިގެން ބައްޕަ މަރާލުމެވެ. ނަސީފްގެ ބައްޕަޔަކީ މިސުރު މީހެއްކަމަށް ސަޢުދީގެ ދާޚިލިއްޔާއިން ބުނެއެވެ. ސަޢުދީ ދާޚިލީ ވުޒާރާއިން ބުނި ގޮތުގައި ނަސީފްގެ މަރާލެވުނު ބައްޕަ، މަރާލުމަށްފަހު އޭނާގެ ހަށިގަނޑުގެ ބައިތައް ނަސީފް ބުރިކޮށްފައިވެއެވެ. އަދި އިތުރު އެހެން މީހަކު މަރާލުމަށް ނަސީފް މަސައްކަތްކޮށްފައިވެއެވެ.

ނަސީފް ގަތުލުކުރެވުނީ ކިހިނެއްކަމެއް، ކޮން ޠަރީގާއެއް ބޭނުންކޮށްގެން ކަމެއް ސަޢުދީ ދާޚިލިއްޔާއިން ހާމަކޮށްފައިއެއްނުވެއެވެ. ޚަބަރުތައް ބުނާ ގޮތުގައި ގަތުލުކުރަންޖެހޭ މީހުން އާންމު ގޮތެއްގައި ސަޢުދީގައި ގަތުލުކުރެވެނީ ބޯބުރިކޮށްލައިގެންނެވެ.

އެމެރިކާގެ ޚާރިޖިއްޔާއިން ބުނި ގޮތުގައި މިދިޔަ ޖުލައިމަހު ޚާރިޖިއްޔާގެ ކަމާބެހޭ ފަރާތްތަކުން ނަސީފް ހުރި ޖަލަށް ޒިޔާރަތްކުރަށްވަވާ، އޭނާއާއި ބައްދަލުކުރެއްވެވިއެވެ. އަދި ޖަލުގައި ނަސީފް ހައްޔަރުކޮށްފައި ބެހެއްޓުމުގައި ގޯހެއް ނެތްކަމަށް އެމެރިކާގެ ޚާރިޖިއްޔާއިން ބުނެފައިވެއެވެ.