ދުނިޔެއަށް ނޭވާލިތަނާހެން ހަތް ކުއްޖަކު ކަތިލާފައިވާ އިނގިރޭސިވިލާތުގެ ގާތިލަކީ އަންހެން ނަރުހެއްކަމަށާއި، މިކުށް އޭނާގެ މައްޗަށް ޘާބިތުވެއްޖެކަމަށް އަލްޖަޒީރާ ނޫހުން ބުނެފިއެވެ.

ނަމަކަށް ލޫސީ ލެޓްބީކިޔާ އުމުރުން 33 އަހަރުގެ މިނަރުހުގެ މައްޗަށް އިތުރު ހަކުއްޖަކު މަރާލަން މަސައްކަތްކުރިކަމުގެ ކުށްވެސް ޘާބިތުވެފައިވެއެވެ. ލެޓްބީ މިޖުރުމުތައް ހިންގާފައިވަނީ އިންގްލޭންޑުގެ ހުޅަނގު އުތުރުގައި ހުންނަ ކައުންޓެސް އޮފް ޗެސްޓަރ ހޮސްޕިޓަލުގައި އޭނާ މަސައްކަތްކުރިއިރުއެވެ. އޭނާ ހައްޔަރުކުރެވުނީ ޖޫން 2015 ން ޖޫން 2016 ށް އެހޮސްޕިޓަލުގައި އުފަންވި ތުއްތުކުދިންތަކެއް މަރުވެފައިވާތީއެވެ.

ލެޓްބީ މިކުދިންތައް މަރާލާފައިވަނީ މިތުއްތު ޖިސްމުތަކުގެ ތެރެއަށް ވައި ފޮނުވައިގެންނާއި، ކާންދޭންނުވާނެ މިންވަރަށް ކާންދީގެންނާއި އިންސިއުލިންދީ ވިހަކޮށްގެންނެވެ.

"މިލިބުނީ ހީނުކުރާފަދަ ސިހުމަކާއި ހައިރާންކަމެއް" ލެޓްބީގެ މައްޗަށް އިއްޔެ މިކުށްތައް ޘާބިތުވުމާއި ގުޅިގެން މެންޗަސްޓަރގެ ކްރައުން ކޯޓުގެ ބޭރުގައި ތިބެ، އިއްވި ގުޅިފައިވާ ބަޔާނެއްގައި މިތުއްތުކުދިންގެ އާއިލާތަކުން ބުންޏެވެ.

މިބަޔާނުގައި މިއާއިލާތަކުން ބުނި ގޮތުގައި ގާތިލާއި ޢަދުލު މިވަނީ އަރާހަމަކޮށްފައިއެވެ. "ނަމަވެސް ގާތިލާއި އަރާހަމަކުރި ޢަދުލަކަށް އަޅުގަނޑުމެންނަށް ލިބުނު ހިތްދަތިކަމާއި އަޅުގަނޑުމެން މިކަމުގައި އައި ރުޅިއާއި މިކަމުގައި އަޅުގަނޑުމެންނަށް ގޮތް ހުސްވި ގޮތްހުސްވުމާއި މިކަންކަމެއް އަޅުގަނޑުމެންގެ ކިބަޔަކުން ވަތްކެއްނުކުރެވޭނެ"، ކަތިލެވުނު ތުއްތު ފުރާނަތުގެ ޙައްގުގައި އާއިލާތަކުން ނެރުނު ބަޔާނުގައި އިތުރަށް ބުނެފައިވެއެވެ.

ލެޓްބީގެ މައްޗަށް ޙުކުމްކުރުން އޮންނާނީ މާދަމާނޫން އަނެއްދުވަހުކަމަށް އަލްޖަޒީރާ ނޫހުން ބުނެއެވެ. މިނޫހުން ބުނާ ގޮތުގައި ލެޓްބީގެ މައްޗަށް ކުރެވޭނީ ދުވަހަކުވެސް ގައިދުޚާނާއިން ސަލާމަތްނުވެވޭނެ ކަހަލަ ޙުކުމެކެވެ.