މަޑަގަސްކަރައިގައި ބާއްވާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) ހުޅުވުމުގެ ރަސްމިއްޔާތު ބަލާލަން ދިޔަ 12 މީހަކު ފިތިގެން މަރުވެއްޖެއެވެ. ސްޓޭޑިއަމް ފުރި ބާރުވުމުގެ ސަބަބުން 80 މީޙުން ޒަހަމްވި ކަަމަށް މަޑަގަސްކަރައިގެ ބޮޑު ވަޒީރު ކްރިސްޓިއަން ސައި ވިދާޅުވިއެވެ.

ހުކުރު ދުވަހު މިހާދިސާ ހޮނގާފައި ވަނީ ބަރެއާ ސްޓޭޑިއަމަށް ވަންނަ ގޭޓް ސަރަހައްދުގައެވެ. ގާތްގަނޑަކަށް 50،000 އެއްހާ ބެލުންތެރިން ވަނީ އެ އިވެންޓުގައި ބައިވެރިވުމަށް އައިސްފައިއެވެ.

އައިއައިއޯޖީގެ ކުޅިވަރުތައް ފެށުމަށް ހަމަޖެހިފައިވަނީ ކުރިއަށް އޮތް ސެޕްޓެމްބަރ މަހުގެ 3 ވަނަ ދުވަހުގައެވެ.

އިންޓަނޭޝަނަލް އޮލިމްޕިކް ކޮމިޓީ (އައިއޯސީ) އިން 1977 ވަނަ އަހަރުގައި ވުޖޫދަށް ގެނައި މި މުބާރާތުގައި ވާދަކުރާ ޤައުމުތަކަކީ މަޑަކަސްކަރަ، ސީޝެލްސް، މޮރީޝަސް، ކޮމޮރޯޒް، މާޔޮޓައި، ރީޔުނިއަން އަދި ރާއްޖެއެވެ.

މަޑަގަސްކަރައިގައި މީގެ ކުރީގައިވެސް މިފަދަ ހާދިސާއެއް ހިނގާފައިވެއެވެ. 2019 ވަނަ އަހަރުގައި އެގައުމުގެ މަހާމަސިނާ ސްޓޭޑިއަމްގައި ހިނގި މިފަދަ ހާދިސާއެއްގައި 15 މީހުން މަރުވިއެވެ.