ހާއްސަ ހުއްދައަކާއި ނުލައި އެމެރިކާގެ ނިއުޔޯކް ސިޓީގެ މިސްކިތްތަކުން އަޑުގަދަކޮށް ބަންގި ގޮވޭނެގޮތް ހަދައި، މިކަން އިއުލާންކޮށްފިއެވެ.

ހާއްސަ ހުއްދައަކާއި ނުލައި މިނިވަންކަމާއިއެކު އެމެރިކާގެ ނިއުޔޯކް ސިޓީގެ މިސްކިތްތަކުން އަޑުގަދަކޮށް ބަންގި ގޮވޭނެގޮތް ހަދައި، މިކަން އިއުލާންކޮށްފައިވަނީ އެސިޓީގެ މޭޔަރ އެރިކް އެޑަމްސްއެވެ. އެޑަމްސް ވިދާޅުވެފައިވާ ގޮތުން، ހާއްސަ ހުއްދައަކާއި ނުލައި ބަންގިގޮވަން ހުއްދަދީފައިވަނީ އެކަމަށް ހާއްސަކުރެވިފައިވާ ގަވާއިދެއްގެ ދަށުންނެވެ.

އެޑަމްސް ވިދާޅުވީ، މިފަދަ ހާއްސަ ގަވާއިދެއް އެކުލަވާލައިފައިވަނީ، އެއްމުޖުތަމައެއްގެ ތެރޭގައި އެކި ދީންތަކުގެ މީހުން ދިރިއުޅޭއިރު، އެއްބައިވަންތަކަމުގެ ރޫހެއް އުފެއްދުމުގެ ބޭނުމުގައިކަމުގައެވެ.

އާ ގަވާއިދުގެ ދަށުން ވަކި ހާއްސަ ހުއްދައަކާއި ނުލައި، ފަތިސްނަމާދާއި، ހުކުރު ނަމާދުގެ އިތުރުން، ރަމަޟާން މަހުގެ މަޣްރިބް ނަމާދުގެ ބަންގި ވެސް ގޮވޭނެއެވެ.

މިގަވާއިދު އާންމު ކުރުމާއެކު، އެމެރިކާގެ ނިއުޔޯކް ސިޓީގެ ޕޮލިސް ޑިޕާޓްމަންޓުގެ ކޮމިއުނިޓީ އެފެއާޒް ބިއުރޯއިން މިސްކިތްތަކާ ގުޅިގެން އާ ގައިޑްލައިންތަކަށް ކަންކަން ހަމަޖެއްސުމުގެ އިތުރުން، އަޑުގަދަކޮށް ބަންގި ގޮވުމަށް ބޭނުންކުރާ ޑިވައިސްތަކުގައި އަޑު ހުރީ އެކަށީގެންވާ ޑެސިބަލް ލެވެލްތަކަށް ސެޓްކޮށްފައިވާކަން ކަށަވަރުކުރަން އެހީތެރިވެދޭނެކަމަށް މޭޔަރު ވިދާޅުވި އެވެ.