މިއަހަރުގެ ޖެނުއަރީން ފެށިގެން މިހާތަނަށް "ހިފާފައިވާ ހުޅަނގު އައްސޭރިން" ފަސްހާހަށްވުރެ ގިނަ ފަލަސްޠީނީން އިސްރާއީލުން ހިފާ، ހައްޔަރުކޮށް އިސްރާއީލުގެ ޖަލުތަކުގައި ބަންދުކޮށްފައިވާކަމަށް ޕެލެސްޓީނިއަން ޕްރިޒަނާސް ކްލަބުން (ޕީޕީސީން) ބުނެފިއެވެ.

މިއަހަރަކީ ފަލަސްޠީނުގެ ހުޅަނގު އައްސޭރީގެ ސިޓީތަކާއި އަވަށްތަކަށް އެހެން އަހަރުތަކާއި ޚިލާފަށް މާގިނައިން އިސްރާއީލުން ހަމަލާދީފައިވާ އަހަރެއްކަމަށްވެއެވެ. ޕީސީސީގެ ރިޕޯޓުގައި ބުނެފައިވާ ގޮތުން ހަފުތާއެއްގެ ތެރޭގައި 200 މީހުން ހައްޔަރުކޮށް ޖަލަށްލެވުނު ހަފުތާ މިމުއްދަތުގެ ތެރޭގައި އައިސްފައިވެއެވެ. މިރިޕޯޓު ބުނާ ގޮތުން މިހާތަނަށް ޔަގީނުންވެސް 5،100 ފަލަސްޠީނީން އިސްރާއީލުގެ ޖަލުތަކުގައި ބަންދުކުރެވިފައިވެއެވެ.

މި 5،100 ފަލަސްޠީނީން ހައްޔަރުކޮށްފައިވަނީ އަލްޚަލީލާއި ނާބުލުސްއާއި ރާމައްﷲއާއި ޖަނީންގައިއެވެ. ފަލަސްޠީނުގެ ޝިހާބު ނޫހުން ބުނި ގޮތުގައި މި 5،100 މީހުން ބޭތިއްބިފައިވަނީ އިސްރާއީލުގެ 23 ޖަލެއްގައިއެވެ.

ޖަލުގައި ބަންދުކުރެވިފައިވާ މިއަދަދުގެ ތެރޭގައި 1،200 މީހުންނަކީ ކުށެއްނުކުރަނީސް ކުށެއްކޮށްފާނެކަމަށް ޖަލުގައި ބަންދުކުރެވުނު މީހުންނެވެ. އަދި 32 އަންހެން ގައިދީންނާއި 180 ކުޑަކުދިން މިއަދަދުގެ ތެރޭގައި ހިމެނެއެވެ. މި 5،100 މީހުންގެ ތެރޭގައި 700 ބަލިމީހުންވެސް ހިމެނެއެވެ.

އިސްރާއީލުން ހައްޔަރުކޮށްފައިވާ މި ފަލަސްޠީނީން ހައްޔަރުކޮށްފައިވަނީ އެމީހުންގެ އާއިލާތަކާއި އެބައިމީހުންގެ މުދަލާއި ތަކެއްޗަށް ބޮޑެތި ގެއްލުންދިނުމަށް ފަހުގައިއެވެ.