އިންޑިއާގައި ކޮވިޑު ޖެހިގެން އެއް އާއިލާ އަކުން މަންމައާއި އޭނާގެ ފަސްފިރިހެންދަރިން މަރުވެއްޖެއެވެ.

ބޮޑުއާބާދީއެއް އޮންނަ އިންޑިއާގެ ޖާރކަންދު ސްޓޭޓްގެ ދާންބާދުސިޓީ އަށް ނިސްބަތްވާ އެއާއިލާއިން ބަލިޖެހިގެން އެއްމެ ފުރަތަމަ މަރުވެފައިވަނީ ނާސިންހޯމެއްގައި ހުރި 88 އަހަރުގެ މަންމައެވެ. މަންމަގެ މަރަށް ފަހު ފުލުފުލުގައި އޭނާގެ ފަސް ފިރިހެން ދަރިން މަރުވެފައިވަނީ 2 ހަފުތާތެރޭގައި ކަމަށް އިންޑިއާގެ ނޫހެއްގައި ރިޕޯޓުކޮށްފައިވެއެވެ.

އެނޫހުގައި ރިޕޯޓުކޮށްފައިވާގޮތުން މަންމަ ގެ މަރަށް މާގިނަދުވަސްތަކެއް ނުވަނީސް އޭނާގެ 65 އަހަރުގެ ދަރިފުޅާއި 67 އަހަރުގެ ދަރިފުޅާއި 72 އަހަރުގެދަރިފުޅުގެ އިތުރުން 70 އަހަރުގެ ދަރިފުޅުވެސް މަރުވިއެވެ. އޭގެ މާގިނަ ދުވަސްތަކެއް ނުވަނީސް އޭނާގެ 60 އަހަރުގެ ދަރިފުޅުވެސް މަރުވެ 2 ހަފުތާތެރޭ އެއާއިލާއިން މަރުވި ޖުމުލަ ހަޔަކަށް އެރިއެވެ.

ނަމަވެސް 60 އަހަރުގެ މީހާ މަރުވެފައިވަނީ ކޮވިޑު ޖެހިގެނެއް ނޫންކަމަށް ރިޕޯޓުތައް ބުނެއެވެ. ޢޭނާމަރުވީ ކެންސަރަށް ފަރުވާކުރަމުންދަނިކޮށެވެ. މި އާއިލާގެ އިތުރު ދެ މީހަކަށް މިހާރުވެސް ކޮވިޑު ޖެހިގެން ފަރުވާދެމުން އެބަދެއެވެ. ނަމަވެސް އެމީހުުންގެ ހާލު ރަނގަޅު ކަމަށް އިންޑިއާގައި ނުކުންނަ ޓައިމްސް ގައި ރިޕޯޓްކޮށްފައިވެއެވެ. އެއާއިލާއިން މަރުވި މުސްކުޅި މަންމަގެ ދަރިންގެ ތެރެއިން މިހާރު ދުނިޔޭގައިތިބީ ދިއްލީގައި ދިރިއުޅެމުންދާ ފިރިހެނަކާއި ކަލްކަތާގައި ދިރިއުޅެމުންދާ އަންހެނެކެވެ.

"ދާބަންދުގެ އެއްވެސް ރައްޔިތަކު ދެކެން ބޭނުންވި ދުވަހެއްނޫންމީ. މި ވައިރަސްއިން މިވަނީ މުޅި އާއިލާ އެއްކޮށް ފޮހެލާފައި. މީ ދާބަންދަށްވެސް ލިބުނު ޝޮކެއް ހިތާމައެއް." އިންޑިއާ ޓައިމްސް އަށް އެއިލާގެ ދުރުތާތިމާގެ މީހަކު އަސަރާއެކު ކިޔައިދީފައި ވެއެވެ.

އިންޑިއާ އަކީ މިހާރު އެއްމެ ހަލުވިކަމާއެކު ބަލިފެތުރެމުންދާގައުމެވެ.