ވަރަށް ބޮޑަށް ބޭނުންވާ ކަމެއް ނުވެފައި އެބައޮތް ހެއްޔެވެ؟ ތިދަނީ ވަރަށް ބޮޑު ބައްޔަކާ ހަނގުރާމަ ކުރަމުން ހެއްޔެވެ؟ ތިއުޅެނީ ވަރަށް ބޮޑު ހިތާމައަކުން އަރައިނުގަނެވިގެން ހެއްޔެވެ؟ ތިހުރީ ދަރަނިތައް ބޮޑުވެގެން ހަނދާނޭ ގޮތް ހުސްވެފައި ހެއްޔެވެ؟

އަޅުގަނޑުމެން މި ކުރިމަތިލީ ބަރަކާތްތެރި ރަމަޟާން މަހަށެވެ. ރޯދަ މަހުގައި ތިޔަ ހުރިހާ ކަމަކަށް ދުޢާ ކުރާށެވެ. ރޯދަ ވިއްލާ ވަގުތުގައި ދުޢާ ކުރާށެވެ. ސަޖިދާގައި ވެސް ދުޢާ ކުރާށެވެ. މާތް ﷲ ގެ ހަޒްރަތުގައި އާދޭސްކޮށް ރޮއެ ހަދާށެވެ. އެންމެ ރެއެއް ވެސް ދުޢާ ނުކޮށް ދޫނުކޮށް ނުލާށެވެ.

މާތް ﷲ، ދުޢާ އިޖާބަކުރައްވާނެ ކަމުގެ ޔަޤީންކަމާއެކު ދުޢާ ކުރާށެވެ. އެއަށްފަހު މާތް ﷲ ގެ އިޖާބައަށް ކެތްތެރިކަމާއެކު މަޑުކުރާށެވެ.

އެންމެ ބޮޑަށް ސަމާލުކަން ދޭންޖެހޭ އެއްކަމަކީ އަބަދުވެސް ޒިކުރު މަތީގައި ދެމި ހުރުމެވެ. އެގޮތުން ޒިކުރު ކުރުންމަތީގައި ދެމި ހުރުމަށް ކުރެވިދާނެ ކަންތައްތަކެއް ބުނެލަދޭނަމެވެ.

ފުރަތަމަ ކަމަކަށް ޒިކުރު ކުރުމަށް ވަކި އަދަދެއް ކަނޑައަޅާށެވެ. މިސާލަކަށް أستغفر الله 500 ނުވަތަ 1000 ފަހަރު ކިޔަން އަޒުމް ކަނޑައަޅާށެވެ. އޭރުން އެ އަދަދު ފުރިހަމަ ކުރުމަށްޓަކައި ގިނަ ވަގުތު ހުރެވޭނީ ޒިކުރު މަތީގައެވެ.

ގުނުމަށްޓަކައި ފޯނުން ނުވަތަ ކުޑަ ތަސްބީހަ ގަޑިއެއް ނުވަތަ ތަސްބީހަ ފައްޗެއްވެސް ގެންގުޅެވިދާނެއެވެ. އޭރުން ހިނގާއިރުގައްޔާއި ސައިކަލު ދުއްވާ ވަގުތުގައި ވެސް ޒިކުރު ކުރެވޭނެއެވެ.

މާތްالله މިރަމަޟާން މަހުގެ ދަރުމައާއި ސަވާބު އަޅަމެން އެންމެނަށް މިންވަރު ކުރަށްވާށި! އާމީން!

-ޝިރުހާން ޢަލީގެ ލިޔުއްވުމަކުން ނަކަލު ކޮށްފައި-