މަޖީދިއްޔާ ސްކޫލަށް ޤަރުނެއް ފުރުން ކުލަގަދަކޮށް ފާހަގަކުރަން ސަރުކާރުން ނިންމައިފިއެެވެ.

މަޖީދިއްޔާ ސްކޫލަށް 100 އަހަރުފުރެން 1000 ދުވަސް ފެށުމުގެ ކައުންޓްޑައުން ފެށުމަށް ބޭއްވި ރަސްމިއްޔާތުގައި ވާހަކަދައްކަވަމުން އެޑިއުކޭޝަން މިނިސްޓަރު ޑރ. އިސްމާޢީލް ޝަފީޢު ވިދާޅުވީ، ރާއްޖޭގެ ތަޢުލީމީ ދާއިރާގެ މުޅި ތާރީޚުގައިވެސް ފާހަގަކުރެވޭ މުހިއްމު މަރުކަޒުކަމުގައިވާ މަޖީދިއްޔާ ސްކޫލަށް ޤަރުނެއް ފުރުން ސަރުކާރުން ކުލަގަދަކޮށް ފާހަގަކުރަން ނިންމާފައިވާ ކަމަށެވެ.

"100 އަހަރުފުރުމުގެ މިޙަފްލާ ވެގެންދާނީ ސަރުކާރުން ވަރަށް އިސްކަމެއްދީގެން އެޑިއުކޭޝަން މިނިސްޓްރީއިން ކުރިއަށްގެންދާ ރަސްމީ ޙަރަކާތެއްގެ ގޮތުގައި." މިނިސްޓަރު ޝަފީޢު ވިދާޅުވިއެވެ

މަޖީދިއްޔާ ސްކޫލަށް ޤަރުނެއް ފުރެން 1000 ދުވަހުގެ ކައުންޓްޑައުން ފެށުމަށް ބޭއްވި ރަސްމިއްޔާތުގައި އެސްކޫލްގައި 20 އަހަރާއި 10 އަހަރަށްވުރެ ދިގު މުއްދަތަކަށް ޚިދުމަތްކުރެއްވި ބޭފުޅުންގެ އަގުވަޒަންކޮށް ޝަރަފް އެެރުވިއެވެ.

ކައުންޓްޑައުން މުއްދަތުގައި މަޖީދިއްޔާ ސްކޫލަށް ޤަރުނެއް ފުރޭ މުނާސަބާއާއި ގުޅިގެން ސްކޫލްގައި ޚާއްސަ މޮނިއުމަންޓެއް ބެހެއްޓުމަށް ބޭނުންވާ ފަންޑު ހޯދުމަށް ހަމަޖެހިފައިވާއިރު މިފަންޑަށް ފައިސާ ހޯދުމަށް ބުދަ ދުވަހުގެ ރޭ އެސްކޫލްގެ ޞަލާޙުއްދީން ހޯލްގައި ސްކޫލްގެ މުސްކުޅި ދަރިވަރުންގެ ބޭންޑުން ޝޯވއެއް ބޭއްވުމަށްވެސް ވަނީ ނިންމާފައެވެ.

މަޖީދިއްޔާ ސުކޫލަށް 100 އަހަރު ފުރޭނީ 2027 ވަނަ އަހަރުގެ އޭޕްރީލް މަހުގެ 18 ވަނަ ދުވަހުގައެވެ.