ޣައްޒާގައި ހަލުވިކަމާއެކު ޕޯލިއޯ ފެތުރެމުންދާ ކަމަށާއި މި ދަނޑިވަޅުގައި ހަނގުރާމަ ހުއްޓާލަން ޖެހޭ ކަމަށް ދުނިޔޭގެ ސިއްހަތު ޖަމިއްޔާ ޑަބްލިޔުއެޗްއޯ އިން ގޮވާލައިފިއެވެ.

ޕޯލިއޯގެ ބަލިމަޑުކަން ފެތުރުން ހުއްޓުވުމަށް "ވަގުތީ ގޮތުން" ނަމަވެސް ހަނގުރާމަ ހުއްޓާލުމަށް ޣައްޒާގެ ހެލްތު މިނިސްޓްރީންވެސް ވަނީ އެދިފައެވެ.

ޣައްޒާގައި ފެތުރެމުންދާ ބަލިމަޑުކަމުގެ ކަންބޮޑުވުން ފާޅުކުރައްވަމުން ޑަބްލިއުއެޗްއޯއިން ބުނެފައިވަނީ ކުޑަކުދިންނާ ހަމައަށް ޕޯލިއޯ ވެކްސިން ފޯރުކޮށްދިނުމަށް ފަސޭހަވެގެންދާނީ މިހާރު އެގައުމުގައި ކުރަމުންދާ ހަނގުރާމަ ހުއްޓާލުމުން ކަމަށެވެ.

ޔަހޫދީ އިސްރާއީލުން ޣައްޒާގައި ހަނގުރާމަ ކުރަމުންދާއިރު ބައެއް މަސްދަރުތަކުން ބުނާ ގޮތުގައި ފާއިތުވި ދެތިން ދުވަސް ތެރޭގައި ފަލަސްތީނުގެ އެކި ސަރަހައްދުގައި އިސްރާއީލުން ދިން ހަމަލާތަކުގައި 33 މީހުން ވަނީ މަރުވެފަ އެވެ.

ހަމާސް އާއި އިސްރާއީލުން ދާދިފަހުން ވަނީ ހަނގުރާމަ ހުއްޓާލުމާއި ގައިދީން ބަދަލުކުރުމަށް ކުރަމުން އައި މަޝްވަރާތައް ހުއްޓުމަކަށްވެސް އައިސްފައެވެ. މަޝްވަރާތައް ކުރިއަށް ނުގެންދެވުނީ ދެފާރާތުންކުރެ ފަރާތަކުން އެއްބަސްވުމަށް އަމަލު ނުކުރާ ކަމަށް ބުނެ ދެފަރާތުންވެސް ތުހުމަތުކުރުމުގެ ސަބަބުންނެވެ.

އިސްރާއީލުން ޣައްޒާއާ ދެކޮޅަށް ކުރަމުންދާ ހަނގުރާމައިގައި މިހާތަނަށް 39،363 މީހުން މަރުވެ 90،923 މީހުން ވަނީ ޒަޚަމްވެފައެވެ. އޮކްޓޯބަރު މަހުގެ ހަތް ވަނަ ދުވަހު ހަމާސް އިން އިސްރާއީލަށް ދިން ރައްދު ހަމަލާތަކުގައި ގާތްގަނޑަކަށް 1،139 މީހުން މަރުވެފައިވާއިރު 200 އަށް ވުރެ ގިނަ މީހުން ހަނގުރާމައިގެ އަސީރުންގެ ގޮތުގައި ވަނީ އަތުލައިގަނެފަ އެވެ.