ސަރުކާރާއި ދެކޮޅަށް ބަންގްލަދޭޝްގައި ކުރަމުންދާ ބޮޑު މުޒާހަރާގައި ބައިވެރިން އެގައުމުގެ ހަތް ފެކްޓަރީއެއްގައި އަލިފާން ރޯކޮށްލައިފިއެވެ.

މުޒާހަރާގައި ރޯކޮށްލި ފެކްޓްރީތަކުގެ ތެރޭގައި ހެދުން ތައްޔާރު ކުރާ ފަސް ފެކްޓަރީ އާއި ފޮތި އުފައްދާ ފެކްޓަރީއަކާއި، ޕްލާސްޓިކް އުފައްދާ ފެކްޓްރީއެއް ހިމެނޭކަމަށް އެގައުމުގެ މީޑިއާތަކުމް ރިޕޯޓް ކުރެއެވެ.

މިހާރު އެގައުމުގައި ކުރިޔަށްދާ މުޒާހަރާތަކުގައި އެތައް ބަޔަކު މަރުވަމުންދާކަން ފާހަގަ ކުރެވެއެވެ. އެގޮތުން އިއްޔެ ހިނގި ކުރިމަތިލުންތަކުގައި މަރުވި މީހުންގެ ތެރޭގައި ފުލުހުންނާއި ސިޔާސީ ބޭފުޅުންވެސް ހިމެނެއެވެ.

ބަންގްލަދޭޝްގައި ކުރިޔަށްދާ މުޒާހަރާގެ ބައިވެރިން ގޮވާލަމުން ދަނީ އެ ގައުމުގެ ބޮޑުވަޒީރު ޝެއިޙް ހަސީނާ ވަގުތުން ވަގުތަށް އިސްތިއުފާ ދެއްވުމަށެވެ. ހަސީނާގެ އިސްތިއުފާއަށް އެގައުމުގެ ރައްޔިތުން ގޮވާލަމުން ދަނީ ސަރުކާރުގެ ވަޒީފާތަކަށް ކޯޓާ ގެނައުމުގެ ނިޒާމު ނިމުމަކަށް ގެނައުމަށް ގޮވާލައި މިދިޔަ ޖުލައި މަހު ދަރިވަރުން ފެށި މުޒާހަރާތައް ހޫނުވެ، 200 މީހުން މަރުވުމެވެ.

މުޒާހަރާތައް ހޫނުވެ ބޮޑެތި ލޭއޮޮހޮރުވުންތަކެއް ހިނގަމުންދާތީ ކަމާބެހޭ ފަރާތްތަކުން ވަނީ އެގައުމުގައި އިންޓަނެޓް ބޭނުންކުރުން ހުއްޓުވައި، ޝޫޓް އޮން ސައިޓް ކާފިއު އިއުލާނުކޮށްފައެވެ. މުޒާހަރާތަކުގައި ފާއިތުވި ހަފުތާތަކުގައި 11،000 މީހުން ވަނީ އެގައުމުގައި ހައްޔަރުކޮށްފައެވެ.