ފައިގެ ދަށްފުށް ހަލާކުވެ، ފަޅައިގެން ދިއުމަކީ ވަރަށް ގިނަ ޒުވާނުންނަށްވެސް، އަދި އުމުރުން ދޮށީ މީހުންނަށްވެސް ކުރިމަތިވާ މައްސަލަައެކެެވެ. މިގޮތަށް ފައި ފަޅައިގެން ދިއުމުން ބައެއް ހާލަތްތަކުގައި ފައިން ލޭ އައިސް ފައިގައި ރިއްސާ، ނުހިނގޭ ގޮތްވެސް ވެއެވެ.

ފައިގެ ދަށްފުށް ފަޅައިގެން ދިއުމަށް ދިމާވާ މައިގަނޑު ސަބަބަކީ ފައިގެ ދަށްފުށުގެ ހަންގަނޑު މާ ބޮޑަށް ހިކުމެވެ. މިގޮތަށް ފައިގެ ހަންގަނޑު ހިކެން މެދުވެެރިވަނީ ފައިގައި އޮއިލް ގްލޭންޑުތައް ނުހުންނާތީއެެވެ. ފައި ފަޅައިގެން ދިއުމުގެ ނިޝާނެއް ފެންނަ ނަމަ އެ މައްސަލަ މާ ބޮޑަށް ގޯސް ނުވަނީސް އެކަމަށް ފަރުވާ ހޯދުމަކީ ވަރަށް މުހިންމު ކަމެކެވެ. އެގޮތުން ތިރީގައި މި ހިމަނާލަނީ ފައިގެ ހަންގަނޑު ފަޅައިގެން ދިއުމުން އެކަމުން ފަރުވާ ހޯދުމަށް ކުރެވިދާނެ ބައެއް ކަންކަމެވެ.

މޮއިސްޗަރައިޒްކުރުން:

ފައިގެ ދަށްފުށް ފަޅައިގެން ދާނަމަ މޮއިސްޗަރައިޒާއެއް ބޭނުން ކޮށް ފައިގެ ދަށްފުށް މޮއިސްޗަރައިޒްކުރުމަކީ ވަރަށް މުހިންމު ކަމެކެވެ. އެގޮތުން ފައިގެ ދަށްފުށަށް ޚާއްޞަ ކޮށްފައިވާ ކްރީމުތަކާއި، އަދި ވެސްލިން ޕެޓްރޯލިއަމް ޖެލީފަދަ އެެއްޗެހި ބޭނުންކޮށްގެން ފައި މޮއިސްޗަރައިޒް ކުރެވުދާނެއެވެ. މިފަދަ އެއްޗެހި ބޭނުން ކުރުމުން ހަންގަޑުގެ އިލާސްޓިސިޓީ އިތުރުކޮށްދީ ހަންގަނޑު ހިކުން ހުއްޓުވައިދެއެވެ.

ގިނައިން ފެން ބުއިން:

ފައިގެ ހަންގަނޑު ފަޅައިގެން ދާނަމަ ގިނަގިނައިން ފެން ބުއިމަކީވެސް އެކަން ހައްލުކޮށްދޭ ކަމެކެވެ. ކޮންމެ ދުވަހަކުވެސް މީހާގެ ހަށިގަނޑަށް ބޭނުންވާ ވަރަށް ފެން ބުއިމަކީ ސިއްހީ އެކި މައްސަލަތައް ހައްލުކުރުމުގެ ގޮތުން ކޮންމެހެން ކުރަން ޖެހޭ ކަމެކެވެ. ގިނައިން ފެން ބުއިމުން ހަނގަޑަށް ބޭނުންވާ ވަރަށް ފެން ލިބި، ހަންގަނޑު ހައިޑްރޭޓުވެއެވެ. އޭގެ ސަބަބުން ހަންގަނޑު ހިކުން ހުއްޓުވައިދެއެވެ. އަދި ހަންގަނޑު ފަޅައިގެން ދިއުމުންވެސް ދުރުކޮށްދެއެވެ.

ކާށިތެޔޮ ބޭނުން ކުރުން:

ކާށިތެޔޮ ބޭނުން ކުރުމަކީވެސް ފައިގެ ހަންގަނޑު ފަޅައިގެން ދިއުމުން އެކަން ހައްލުކުރުމަށްޓަކައި ބޭނުންކުރެވިދާނެ އެއްޗެކެވެ. ކާށިތެލަކީ ހަންގަނޑުގެ އެކި މައްސަލަތަކަށް އޮތް ފަރުވާއެކެވެ. އޭގައި އެކުލެވިގެންވާ އެންޓި އިންފްލެމޭޓަރީ ޕްރޮޮޕަޓީތަކާއި، އެންޓި މައިކްރޯބިއަލް ޕްރޮޮޕަޓީތަކުގެ ސަބަބުން އެ ބޭނުން ކުރުމުން ފައިގެ ހަންގަނޑު ފަޅައިގެން ގޮސްފައި ހުންނަ ތަންތަން ރަނގަޅުކޮށްދީ، ފައިގެ ހަންގަނޑު ރީތިކޮށްދެއެވެ.

ފައި އެކްސްފޮލިއޭޓްކުރުން:

ފައިގައި ފަޅައިގެން ގޮސްފައި ހުންނަ ތަނުގެ ހަންގަނޑު ހުންނާނީ އާންމު ގޮތެއްގައި ހަންގަނޑު ހުންނަ ވަރަށްވުރެ ހަރުވެފައި ބޯކޮށެވެ. އެހެންކަމުން ފައި އެކްސްފޮލިއޭޓު ކުރުމުން ފައިގެ ފަޅައިގެން ގޮސްފައި ހުންނަ ތަންތަން ރަނގަޅުވުމަށް އެހީވެދެއެވެ. ފައި އެކްސްފޮލިއޭޓު ކުރުމަށްޓަކައި ސައިބޯނި އަޅައިފައި ހުރި ތާފަނާ ފެން އެއްޗަކަށް އަޅައި 20 މިނެޓު ވަންދެން އޭގެ ތެރެއަށް ފައި ލައިގެން ހުރުމަށްފަހު، ސްކްރަބްކުރާ އެއްޗެއް ބޭނުން ކޮށްގެން ފައިގައި ހަންގަނޑު ބޯވެފައި ހުރި ތަނުގައި ކާއްތައި، އެތަނުގައި ހުރި ހަންތައް ނައްތާލާނީއެވެ. ދެން ފައިގައި ހުރި ފެން ހިއްކާލުމަށްފަހު ފައި ރަނގަޅަށް މޮއިސްޗަރައިޒު ކޮށްލާނީއެވެ.