ތުންފަތް ހިކި، ތުންފަތުން ހަންފޮޅުމަކީ ވަރަށް ގިނަ މީހުންނަށް ކުރިމަތިވާ މައްސަލައެކެވެ. މިކަން ރަނގަޅު ކުރުމަށްޓަކައި އެކި ކަހަލަ ލިޕް ބާމުތަކާއި އެކި ކަހަލަ ޓްރީޓުމެންޓުތައް ބޭނުން ކުރާ މީހުންވެސް މަދެއް ނޫނެވެ. ނަމަވެސް ތުންފަތް ރީތި ކުރުމަށް މި ބޭނުންކުރާ އެއްޗިއްސަކީ އަގު ބޮޑު އެއްޗިއްސަށް ވުމުން، މިއީ ކޮންމެ ކޮންމެ މީހަކަށް ގަނެވޭނެ، އަދި ބޭނުން ކުރެވޭނެ އެއްޗިއްސެއްވެސް ނޫނެވެ. އެހެންކަމުން ތިރީގައި މި ހިމަނާލަނީ ތުންފަތް ހިކި ހަންފޮޅޭނަމަ އެކަމަށް ފަރުވާ ކުރުމަށް ގޭގައި ކުރެވިދާނެ 5 ކަމެވެ.

ގިނައިން ފެން ބުއިން:

ތުންފަތް ހިކި، ތުންފަތުން ހަންފޮޅޭނަމަ ގިނަ ގިނައިން ފެން ބުއިމަކީ ވަރަށް މުހިންމު ކަމެކެވެ. ސަބަބަކީ ގިނަ ފަހަރަށް ތުންފަތުން ހަންފޮޅި ތުންފަތް ހަލާކުވަނީ ހަށިގަނޑަަށް ބޭނުން ވާ ވަރަށް ފެން ނުލިބޭތީ ކަމަށް ވާތީއެވެ. ވީމާ މި މައްސަލަ ދިމާވާނަމަ ގިނަގިނައިން ފެން ބުއިމުން، ތުންފަތް ރަނގަޅަށް ހައިޑްރޭޓުވެ، މި މައްސަލަ ހައްލު ވުމަށް އެހީވެދެއެވެ.

މާމުއި ބޭނުން ކުރުން:

މާމުއިއަކީ އަކީ "ނެޗުރަލް ހިއުމެކްޓެންޓެއް" ކަމުން ތުންފަތުގައި މާމުއި އުނގުޅާނަމަ ގިނަ ވަގުތު ތުންފަތުގައި ތެއްކަން ހިފަހައްޓައިދިނުމަށް އެހީވެދެއެވެ. އެގޮތުން ތުންފަތުގައި ތުނި ފަށަލައަކަށް މާމުއި ހާކާފައި 15 މިނެޓު ވަންދެން ބެހެއްޓުމަށްފަހު ދޮވެލުމުން މުޅި ދުވަހު ތުންފަތުގައި ކޮންމެވެސް ވަރެއްގެ ތެތްކަމެއް ބަހައްޓައިދެއެވެ. އަދި އޭގެ ސަބަބުން ތުންފަތުން ހަންފޮޅިފައިވާ ތަންތަން ރަނގަޅުކޮށްދީ، ތުންފަތް ރީތިކުރުމަށް އެހީވެދެއެވެ.

ކާށި ތެޔޮ ބޭނުން ކުރުން:

ކާށި ތެލަކީ އޭގައި ގިނަ އަދަދަކަށް ފެޓީ އެސިޑު އެކުލެވުގެންވާ އެއްޗަކަށްވު،ުން ތުންފަތުގައި ކާށި ތެޔޮ އުނގުޅާނަމަ، ތުންފަތް ތެއްކަންމަތީ ބަހައްޓައިދިނުމަށް އެހީވެއެވެ. އެހެންކަމުން ދުވަހުގެ އެކި ގަޑިތަކުގައި މި ބޭނުން ކުރުމުން ތުންފަތް މޮއިސްޗަރައިޒު ކޮށްދީ، ރީތި ވުމަށް އެހީވެދެއެވެ.

އެލޮވޭރާ ޖެލް ބޭނުން ކުރުން:

އެލޮވޭރާ ޖެލް އަކީ މޮއިސްޗަރައިޒު ކޮށްދިނުމަށް އެހީވެދޭ އެއްޗެއް ކަމުން، ތުންފަތުން ހަންފޮޅޭނަމަ މި ބޭނުން ކުރުމުން ތުންފަތުގައި ހަންފޮޅިފައި ހުންނަ ތަންތަން ރަނގަޅު ކޮށްދީ ތުންފަތް ރީތި ވުމަށް އެހީޥެއެވެ. ވީމާ ކޮންމެ ދުވަހަކުވެސް އެލޮވޭރާ ޖެލް ކޮޅެއް ތުންފަތިގައި އުނގުޅާފައި 15 މިނެޓު ވަންދެން ބެހެއްޓުމަށްފަހު ދޮވެލުމުން މުޅި ދުވަހު ތުންފަތް ތެއްކަންމަތީ ބަހައްޓައި ދިނުމަށް އެހީވެދެއެވެ.

ޝުގާ ސްކްރަބް އެއް ބެނުން ކުރުން:

ތުންފަތުން ހަންފޮޅިފައިވާނަމަ އެކަން ރަނގަޅު ކުރުމަށްޓަކައި ޝުގާ ސްކްރަބުވެސް ބޭނުން ކުރެވިދާނެއެވެ. އެގޮތުން އެއް ސަމުސާ ހަކުރާއި އެއް ސަމުސާ މާމުއި ރަނގަޅަށް އެއްކޮށްލުމަށްފަހު، މި ސްކްރަބު ތުންފަތުގައި އުނގުޅާލާފައި ރަނގަޅަށް މަސާޖު ކުރުމުން ތުންފަތް އެކްސްފޮލިއޭޓު ކޮށްދީ، ތުންފަތުގައި ހުންނަ މަރުވެފައިވާ ހަންތައް ނައްތާލުމަށް އެހީވެދެއެވެ. އަދި އޭގެ ސަބަބުން ތުންފަތް އޮމާން ކޮށްދީ ހައިޑްރޭޓު ކޮށްދިނުމަށްވެސް އެހީވެދެއެވެ.