އަނިޔާވެރިކަމުގައި ދެވަނައެއް ނެތް އިސްރާއިލުގެ ޓެރަރިސްޓު ދައުލަތުން ޣައްޒާގައި ހިންގަމުންދާ ގަތުލުއާމާ ހުރެ ނިދާލާނެ ވަގުތެއް ނުވާ ކަމަށް, ޣައްޒާގައި ޝަހީދުވާ މީހުން ވަޅުލަން ވަޅުކޮށްނަ މީހަކު ބުނެފި އެވެ.

އިސްރާއިލުން މިދިޔަ އޮކްޓޫބަރު މަހު ފެށި ގަތުލު އާންމުގައި ޣައްޒާގެ 40،000 އަށް ވުރެ ގިނަ މީހުން ވަނީ ޝަހީދުކޮށްލައިފަ އެވެ.

އެހެން ނަމަވެސް އިމާރާތްތަކުގައި ތާށިވެފައި އެތައް ބަޔަކު ދަށުވެ ޝަހީދުވެފައިވާ ކަމަށް ބެލެވޭ އިރު, ޝަހީދުވި މީހުންގެ އަދަދު, މިހާރު އާންމުކޮށްފައިވާ ރަސްމީ އަދަދުތަކަށް ވުރެ މާބޮޑަށް އިތުރުވާނެ ކަމަށް ވެސް ވަނީ ބެލެވިފަ އެވެ.

ޣައްޒާގެ މެދު ތެރޭގައި ހުންނަ އެންމެ ބޮޑު ގަބުރުސްތާނުގައި ވަޅުކޮންނަން އުޅޭ ބަރަކާ ބުނީ ގަތުލު އާންމުގެ ކުރިން ހަފްތާއަކު އެންމެ ގިނަވެގެންވެސް ވަޅުލަނީ ފަސް މީހުންކަމަށެވެ. އަދި އާންމުކޮށް ވަޅުލަނީ ހަފްތާއެކު ދެ މީހުން ކަމަށެވެ.

އެހެން ނަމަވެސް މިހާރު ދުވާލަކު 200 އާ 300 މީހުން ވަޅުލާ ކަމަށް އޭނާ ބުންޏެވެ. އަދި ގަބުރުސްތާނު ފުރިގެން ގޮސް އެއް ގަބުރުގެ މަތީގައި އަނެއް ގަބުރު ވަޅުލަން ވެސްޖެހިފައިވާ ކަމަށެވެ.

ބަރަކާ ބުނީ މި ވަރުގެ ގަތުލު އާންމެއް އޭނާގެ ހަޔާތުގައި ވެސް ނުދެކޭ ކަމަށެވެ. އަދި ހަމަލާތަކުގައި ހަށިގަނޑުގެ އެކިތަންތަން ބުރިވެ ސިފަ ގެއްލިފައި ތިބޭ މީހުން ވަޅުލުމަށް ފަހު ނިދަން ވެސް އިންތިހާއަށް އުނދަގޫ ކަމަށެވެ.