ޗައިނާގެ ހައިނާންގެ ސަރަހައްދަށް މިހާރު އަރަމުންދާ ތޫފާން ޔާގީގެ ސަބަބުން ހަތަރު ލައްކަ މީހުން ރައްކާތެރި ސަރަހައްދުތަކަށް ބަދަލުކޮށްފައިވާ ކަމަށް އެގައުމުގެ ކަމާބެހޭ ފަރާތްތަކުން މައުލޫމާތު ދީފިއެވެ.

ތޫފާން ޔާގީގެ ސަބަބުން ޗައިނާގެ ދެކުނުގެ އައްސޭރިފަށުގެ ބޮޑު ބައެއްގެ އިތުރުން ހޮންކޮންގާއި މަކާއޯއަށް ބޯކޮށް ވާރޭވެހި ފެންބޮޑުވުމުގެ ހާދިސާތައް ދަނީ ކުރިމަތިވަމުންނެވެ.

މި ތޫފާނާއި ގުޅިގެން ހައިނާންގައި ސްކޫލްތައް ބަންދުކޮށްފައިވާއިރު މުޅި ސަރަހައްދުގެ ޕަބްލިކް ޓްރާންސްޕޯޓްވެސް ވަނީ ހުއްޓުމަކަށް ގެނެސްފައެވެ. އަދި ދުނިޔޭގެ އެންމެ ދިގު، ކަނޑު ހުރަސްކުރުމަށް ބޭނުން ކުރާ ހޮންކޮންގް-މަކައު-ޒުހައި ބްރިޖް ވެސް ވަނީ ބަންދުކޮށްފަ އެވެ. އެ ތޫފާނުގެ ސަބަބުން ހޮންކޮންގް ސްޓޮކް އެކްސްޗޭންޖް ވެސް ބަންދުކޮށްފައިވާކަން ފާހަގަ ކުރެވެ އެވެ.

މިއަދު ހެނދުނު ތޫފާނުގެ ބާރުމިން ގަޑިއަކު 245 ކިލޯމީޓަރަށް އަރާފައިވާއިރު، މިއީ ސަލާމަތީ ގޮތުން ވަރަށް ނުރައްކާތެރި ދަނޑިވަޅެއް ކަމަށް ދިރާސާ ކުރައްވާ ފަރާތްތަކުން ވަނީ ބުނެފައެވެ.

ހުކުރު ދުވަހުގެ މެންދުރު ފަހު ހައިނާން ޖަޒީރާގެ އުތުރަށް މި ތޫފާން މިސްރާބު ޖަހާފައިވާ ކަމަށް މޫސުމާ ބެހޭ އިދާރާއިން މައުލޫމާތު ދެއެވެ. އަދި ކުރިޔަށް އޮތް ހަފްތާ ބަންދުގައި މި ތޫފާން ވިއެޓްނާމާއި ލާއޯސްއާ ދިމާއަށް ދިއުމުގެ ކުރިން ޗައިނާގެ ބޮޑު ސަރަހައްދަކަށް މީގެ އަސަރުކުރާނެ ކަމަށް ބެލެވޭ ކަމަށް މޫސުމާ ބެހޭ އިދާރާއިން ބުނެ އެވެ.