މުޅި ރާއްޖޭގެ ހުރިހާ ރަށެއްގައި މުޒާހަރާކުރުމަށް ނިންމާފައިވާކަމަށް އިދިކޮޅު ކޯލިޝަނުން ބުނެފިއެވެ.

ޕީޕީއެމް އޮފީހުގައި މިއަދު ބޭއްވި ނޫސްވެރިންގެ ބައްދަލުވުމުގައި ޕީއެންސީގެ ނައިބުރައީސް އިބްރާހީމް ޝުޖާޢު ވިދާޅުވީ މިސަރުކާރުން ދިވެހިރާއްޖެ ދަރަނިވެރި ކުރުވާ ރާއްޖޭގެ ހަރުމުދާތައް މޯގޭޖު ކޮށްގެން ލޯނު ނަގަމުން ދާތީ އެކަމާ ދެކޮޅަށް މާލެ ސަރަހައްދު ފިޔަވާ އަތޮޅުތެރޭގެ އެހެން ހުރިހާ ރަށެއްގައި "ރާއްޖެ ވިއްކުމާ ދެކޮޅަށް،" މިނަމުގައި މުޒާހަރާ ކުރުމަށް ނިންމަފައިވާކަމަށެވެ.

މިއަންނަ ހުކުރު ދުވަހު ބޭއްވުމަށް ނިންމާފައިވާ މި މުޒާހަރާ ތަކަކީ ސުލްހަވެރި ކަމާއިއެކު ކުރިއަށް ދާނެ މުޒާހަރާތަކެއް ކަމަށްވެސް ޝުޖާއު ވިދާޅުވިއެވެ.

ޝުޖާއު ވިދާޅުވީ މިއަދު ސަރުކާރުގައި ތިއްބެވި ބޭފުޅުން ކުރިން އިދިކޮޅުގައި އޮތްއިރު އެންމެ ބާރަށް ދެއްކި އެއް ވާހަކައަކީ ކުރީގެ ރައީސް ޔާމީންގެ ސަރުކާރުން ޗައިނާއަށް ރާއްޖޭގެ 12 ފަޅު ރަށެއް ވިއްކާލި ވާހަކަ ކަމަށެވެ. އެހެން ނަމަވެސް ރައީސް ޔާމީން އަކީ ރާއްޖޭގެ ހަރުމުދާ ވިއްކައިގެން ރާއްޖެ ތަރައްގީ ކުރާނެ ބޭފުޅެއް ނޫންކަން ހުރިހާ ދިވެހި ރައްޔިތުންވެސް ދަންނާނެ ކަމަށް ޝުޖާއު ވިދާޅުވިއެވެ.

މީގެ އިތުރުން އަވަށްޓެރި ގައުމުތަކުން ބޮޑެތި ލޯނުތައް މިސަރުކާރުން ނަގަމުން އަންނަ އިރު ރާއްޖޭގެ މިނިވަންކަން ގެއްލޭ ހާލަތަށް ގޮސްފައިވާ ކަމަށާއި، އެގޮތުން ރާއްޖޭގެ ބައެއް އެއާޕޯޓުތައް ދިގު މުއްދަތަށް ކުއްޔަށް ދިނުމާ އައްޑޫ ސިޓީގެ ބައެއް، ދިގު މުއްދަތަށް ކުއްޔަށް ދިނުން ވެސް ހިމެނޭ ކަމަށްވެސް ޝުޖާއު ވިދާޅުވިއެވެ.

މި ބައްދަލުވުމުގައި އެޓޯލް ކޯޑިނޭޝަން ކޮމެޓީގެ ޗެއާމަން ރައްޔިތުންގެ މަޖިލީހުގެ މަޑަވެލި ދާއިރާގެ ކުރީގެ މެމްބަރު މުއާޒު މުހައްމަދު ރަޝީދު ވިދާޅުވީ މާލެ ސަރަހައްދު ފިޔަވާ މީހުން އުޅޭ އެހެން ހުރިހާ ރަށެއްގައި އަންނަ ހުކުރު ދުވަހު ހަވީރު 4:00 އިން އިރުއޮއްސި 6:000 އަށް މުޒާހަރާ ކުރިއަށް ދާނެ ކަމަށާއި، ސުލްހަވެރިކަމާ އެކު ކުރިއަށް ގެންދާ މުޒާހަރާގައި މިސަރުކާރުން ކުރަމުން ގެންދާ ނޭއްގާނީ ކަންތައްތަކާޢި ދެކޮޅަށް އަޑުއެފުލާނެ ކަމަށެވެ.

ޕީޕީއެމް ޕީއެންސީ ކޯލިޝަންގެ މެމްބަރުންގެ އިތުރުން ސަރުކާރު ކޯލިޝަންގައި ހިމެނޭ ޕާޓީތަކުގެ މެމްބަރުންނަށްވެސް އެ މުޒާހަރާތަކަށް ދައުވަތު ދޭ ކަމަށް އިދިކޮޅު ކޯލިޝަނުން ވަނީ ބުނެފައެވެ.