ނިރުބަވެރި އިސްރާއީލުން މިހާރު އަމާޒުހިފާފައި ވަނީ ޣައްޒާގެ ސިއްހީ ނިޒާމު އެއްކޮށް ފުނޑުގުނޑުކޮށްލަން ކަމަށް އދ. އިން ބުނެފިއެވެ.

އދ. އިން މިފަދައިން ބުނެފައިވާއިރު ނިރުބަވެރިންގެ ހަމަލާތަކުގައި ޣައްޒާގެ ގިނަ ހޮސްޕިޓަލްތައް މިހާރުވެސް ވަނީ ސުންނާފަތިކޮށްލާފައެވެ. އެމެރިކާއިން ދޭ އަސްކަރީ އެހީއާއި އެކު އިސްރާއީލުން ޣައްޒާގައި ހިންގަމުންނާ ޖަރީމާތަކުގައި ސިއްހީ ދާއިރާގައި މަސައްކަތް ކުރާ ފަރާތްތަކާއި ހޮސްޕިޓަލްތަކާއި އެމްބިއުލާންސް ތަކަށްވެސް ސީދާ ހަމަލާތައް ދެމުންދާކަން ފާހަގަ ކުރެވެއެވެ.

ޣައްޒާގެ އޮފިޝަލުންނާ ހަވާލާދީ މީޑިޔާ ތަކުން ރިޕޯޓްކުރާ ގޮތުގައި އިސްރާއީލުން ޣައްޒާަގެ ހޮސްޕިޓަލްތަކަށް ހަމަލާތައް ދެމުންދަނީ އެތަންތާގައި މުޖާހިދުން ތިބި ކަމަށް ބުނެއެވެ.

އިސްރާއީލުން ދިން ވައިގެ ހަމަލާތަކުގައި ބުރާސްފަތި ދުވަހު އެކަނިވެސް ޣައްޒާގެ 95 މީހުން މަރުވެފައިވާކަމަށް ސިއްހީ ދާއިރާގެ މަސްދަރުތަކުން ބޭރުގެ މީޑިޔާ އަލްޖަޒީރާއަށް ރިޕޯޓްކޮށްފައިވާ ކަމަށް އެ ނޫހުން ވަނީ ބުނެފައެވެ.

ޣައްޒާގެ ދިފާއުގައި ހަރަކާތްތެރިވަމުންދާ ހިޒްބުالله އިންވެސް ދަނީ އިސްރާއީލާއި ދެކޮޅަށް ހަމަލާތައް ދެމުންކަން ފާހަގަ ކުރެވެއެވެ. އެގޮތުން އިސްރާއީލުގެ އުތުރުގައި ހިޒްބުالله އިން ދިން ރޮކެޓް ހަމަލާތަކުގައި ހަތް މީހަކު ވަނީ މަރުވެފަ އެވެ.

ޣައްޒާގައި އިސްރާއީލުން ހިނގަމުންދާ ނަސްލު ނައްތާލުމުގެ ހަނގުރާމައިގައި އޮކްޓޯބަރު 7، 2023 އިން ފެށިގެން މިހާތަނަށް 43،204 ފަލަސްތީނު މީހުން މަރުވެ 101،641 މީހުން ވަނީ ޒަޚަމްވެފައެވެ.