ރާއްޖޭގައި ބީޗު ހޭންޑްބޯޅައިގެ ގައުމީ ސްކޮޑެއް އެކުލަވާލުމަށް ނިންމައި އެ ސްކޮޑްގައި ބައިވެރިވުމުގެ ފުރުސަތު އާންމުކޮށް ހުޅުވާލައިފިއެވެ.

ސަރުކާރުގެ ގެޒެޓުގައި ހޭންޑްބޯލް މޯލްޑިވްސްއިން ކުރި އިއުލާނެއްގައި ބުނީ އެ އެސޯސިއޭޝަނުން ސީނިއާ ފިރިހެން ޤައުމީ ބީޗް ހޭންޑްބޯލް ސްކޮޑެއް އެކުލަވާލުމަށް ބޭނުންވާ ކަމަށެވެ. އަދި އެކަމަށް ޝައުޤުވެރިކަންހުރި ހުރިހާ ފަރާތްތަކަށް، އެ ފުރުސަތު ހުޅުވާލެވިފައިވާކަން އިއުލާނުގައި ވަނީ ބުނެފައެވެ.

މި ސްކޮޑްގައި ބައިވެރިވުމަށް ޝައުޤުވެރިވާ ފަރާތްތަކުން މިމަހުގެ 20 ގެ ކުރިން ހޭންޑްބޯލް މޯލްޑިވްސްއިން ކުރި އިއުލާނުގައި ބަޔާންކޮށްފައިވާ ގޫގުލް ފޯމް ފުރިހަމަކުރުމަށް އެ އެސޯސިއޭޝަނުން ވަނީ އެދިފައެވެ.

ސީނިއާ ފިރިހެން ޤައުމީ ބީޗް ހޭންޑްބޯލް ސްކޮޑުގެ ފަރިތަކުރުންތަކުގައި ބައިވެރިވެވޭނީ 18 އަހަރުން މަތީގެ ޒުވާނުންނަށް ކަމަށް ހޭންޑްބޯލް މޯލްޑިވްސްއިން ވަނީ ބުނެފައެވެ. އަދި ގައުމީ ޓީމުގެ ފަރިތަކުރުންތަކުގައި ބައިވެރިވުމަށް ޝައުގުވެރިވާ ފަރާތްތަކުން އިތުރު މައުލޫމާތު ހޯދުމަށް އެ އެސޯސިއޭޝަނާ ގުޅުމަށް އެސޯސިއޭޝަނުން ވަނީ އެދިފައެވެ.

ގައުމީ ޓީމުގެ ފަރިތަކުރުންތައް ކުރިއަށްގެންދިއުމަށް ހަމަޖެހިފައިވަނީ ކުޅުދުއްފުށި ސިޓީގެ ބީޗު ހޭންޑްބޯލް ކޯޓުގައެވެ.