ކައިވެންޏަކީ ވަރަށް މާތް މަގްސަދެއްގައި ކުރެވޭ ކަމަކަށްވީއިރު، ކައިވެނި ޕާޓީތައް ވަރަށް ކުލަގަދަކޮށް ފާހަގަ ކުރުމަކީ ކޮންމެ މީހަކުވެސް ބޭނުންވާ ކަމެކެވެ. ނަމަވެސް ބައެއް ހާލަތްތަކުގައި ކައިވެނީގެ ހަފްލާ އޭގެ އެންމެ ފުރިހަމަ ގޮތުގައި ނުވަތަ އެމީހަކަށް އެންމެ ކަމުދާ ގޮތަަށް ނުބޭއްވިވެސް ހިނގައިދާނެއެވެ. މިކަން މިހެން ދިމާވަނީ ކައިވެނި ހަފްލާ ބޭއްވުމަށް ވާން ޖެހޭ ތައްޔާރީތައް ނުވެވޭތީއެވެ.

އެހެންކަމުން މިފަހަރު މި ހިމަނާލަނީ ކައިވެނި ހަފްލާއަކަށް ތައްޔާރުވާއިރު އެންމެ ބޮޑަށް ސަމާލުވާންވީ ކަންކަމެވެ.

ތީމު ކަނޑައެޅުން

ކައިވެނި ހަފްލާއަކަށް ތައްޔާރުވާއިރު އެންމެ ފުރަތަމަ ކުރަންޖެހޭ ކަމަކީ އެމީހަކު ބޭނުންވާ ތީމެއް ކަނޑައެޅުމެވެ. އަދި ތީމެއް ކަނޑައަޅައި، އެ ތީމަކާ ބެހޭ ގޮތުން ދިރާސާ ކޮށް، އެތީމަކާ ގުޅޭ މޫޑް ބޯޑެއް ހެދުމަކީވެސް ވަރަށް މުހިންމު ކަަމެކެވެ. އަދި ހަފްލާ ބާއްވަން ބޭނުންވާ ތަނާއި، ހެދުން ފަހަން ބޭނުންވާ ގޮތްވެސް ކަނޑައެޅުމަކީ ވަރަށް މުހިންމު ކަމެކެވެ. މިހެން ހެދުމުން ކައިވެނި ހަފްލާ ކުރިއަށްގެންދަން ބޭނުންވާ ގޮތުގެ ހިޔާލެއް ލިބޭނެއެވެ. އަދި މި ހުރިހާ ކަމެއް ބެލުމަށްފަހު އާއިލާއާއި އެކުވެރިންގެ ލަފާ ހޯދައިގެން ކުރިއަށް ދިއުމުން ކައިވެނި ހަފްލާ ކާމިޔާބު ވާނެއެވެ.

ބަޖެޓު ކަނޑައެޅުން

ކައިވެނީގެ ތީމު ކަނޑައެޅުމަށްފަހު ދެން ކުރަންޖެހޭ އެންމެ މުހިންމު ކަމަކީ ބަޖެޓެއް ކަނޑައެޅުމެވެ. ކައިވެނީގެ ހަފްލާއަށް ބަޖެޓެއް ކަނޑައެޅުމުން އެކި ކަންކަމަށް ހަރަދު ކުރަން ޖެހޭ މިންވަރު އެގޭނެއެވެ. އަދި އޭގެ ސަބަބުން ހުރިހާ ކަމެއްވެސް ބަޖެޓުގެ ތެރެއަށް ފެތި ފައިސާގެ މައްސަލައެއް ކުރިމަތިނުވެ ނިމިގެން ދާނެއެވެ.

މެހެމާނުންގެ ލިސްޓު ހެދުން

ކައިވެނިހަފުލާއަށް ތައްޔާރުވާއިރު ދެން ކުރަން ޖެހޭ އެންމެ މުހިންމު ކަމަކީ މެހެމާނުންގެ ލިސްޓު ހެދުމެވެ. ލިސްޓު ނަހަދާނަމަ ބައެއް ހާލަތްތަކުގައި އާއިލީ ބައެއް މީހުންނަށް ނުވަތަ ގާތް އެކުވެރިންނަށް ދައުވަތު ނުދެވިވެސް ހިނގައިދާނެއެވެ. އަދި އެކަމުގެ ސަބަބުން އެމީހުންނާ މޫނު ކެނޑޭ ގޮތްވެސް ވެދާނެއެވެ. މިކަމުން ދުރުވެ، ގާތް އެންމެނަށް ދައުވަތު ދިނުމަށްޓަކައި ލިސްޓެއް ގާއިމް ކުރުމަކީ ވަރަށް މުހިންމު ކަމެކެވެ.

މަސްދަރު: ޕިންކްވިލާ