ކައިވެންޏަކީ ވަރަށް މާތް މަގްސަދެއްގައި ކުރެވޭ ކަމެކެވެ. މިއީ ދެ މީހަކު އެމީހުންގެ ލޯބި އިތުރަށް އާލާކޮށް، އާއިލާއެއް ބިނާކޮށް، މުޅި އުމުރު އެކުގައި ހޭދަކުރުމުގެ ގޮތުން އަޅާ އެންމެ މުހިންމު ފިޔަވަޅެވެ. އެހެންކަމުން ކައިވެންޏެއް ފަށާއިރު ބައިވެރިޔާއާއި ތިބާއާ ދެމެދުވާ ގުޅުމަކީ ވަރުގަދަ ގުޅުމެއްތޯ ބަލަން ޖެހެއެވެ. ތިރީގައި މި ހިމަނާލަނީ މިކަން ދެނެގަތުމަށްޓަކައި ބައިވެރިޔާއާއި އެކު މަޝްވަރާ ކުރަން ޖެހޭ ބައެއް ކަންކަމެވެ.

މުއާމަލާތު ކުރާ ގޮތް

ކޮންމެ މީހަކީވެސް ތަފާތު މިޒާޖެއްގެ މީހެކެވެ. އެކި މީހުން މުއާމަލާތު ކުރާނީ އެކި ގޮތްގޮތަށެވެ. ކައިވެންޏެއްގައި ތަފާތު އެކި ކަންކަމާ ދެބަސްވާ ވަގުތު އަންނާނެއެވެ. އެކަކު އަނެކަކުދެކެ ރުޅި އަންނަ ވަގުތުވެސް އަންނާނެއެވެ. އެހެންކަމުން މިފަދަ ވަގުތުތަކުގައި އެކަކު އަނެކަކާ މުހާތަބުކޮށް މުއާމަލާތު ކުރަން ޖެހޭ ގޮތް ކައިވެނީގެ ކުރިން ދެނެގަންނަން ޖެހެއެވެ. ވީމާ ކައިވެނި ކުރުމުގެ ކުރިން މިކަމާމެދު މަޝްވަރާ ކުރުމަކީ ވަރަށް މުހިންމު ކަމެކެވެ.

ދެމީހުންގެ ގުޅުމާމެދު ދެކޭ ގޮތް

ކައިވެންޏެއް ފެށުމުގެ ކުރިން ދެމީހުންގެ ގުޅުމާމެދު ބައިވެރިޔާ ދެކޭ ގޮތް ދެނެގަތުމަކީވެސް ވަރަށް މުހިންމު ކަމެކެވެ. ބައެއް ހާލަތްތަކުގައި ބައިވެރިޔާ ދެކޭ ގޮތަކަށް ނުބަލައި ކަންކަން ނިންމުމުގެ ސަބަބުން ދެމީހުންގެ ދެމެދުގައި މައްސަލަތައް ދިމާވެ، އޭގެ ސަބަބުން ދެމީހުންގެ ގުޅުން ހީނަރުވާ ގޮތް ވެއެވެ. އެހެންކަމުން އެކަކު އަނެކެއްގެ އިހުސާސްތައް ދެނެގަތުމަކީ ވަރަށް މުހިންމު ކަމެކެވެ.

މާލީ ކަންތައް ބަލަހައްޓާނެ ގޮތް

ބައެއް އާއިލާތައް ރޫޅެން މެދުވެރިވާ އެންމެ ބޮޑު އެއް ސަބަބަކީ ފައިސާގެ މައްސަލަތައް ކުރިމަތިވުމެވެ. އެހެންކަމުން ކައިވެނި ފެށުމުގެ ކުރިން ދެމީހުންވެސް އެކަކު އަނެކެއްގެ މާލީ ހަޔާތާ ބެހޭ ގޮތުުން މަޝްވަރާ ކުރަން ޖެހެއެވެ. އަދި މާލީ ކަންތައްތައް ބަލަހައްޓާނެ ގޮތްވެސް ނިންމަން ޖެހެއެވެ.

މަސްދަރު : އީޓައިމްސް