އެމެރިކާއިން ހަތިޔާރު ފޯރުކޮށްދޭ އިސްރާއީލުގެ ސިފައިން, ލުބުނާނުގެ ވެރިރަށް ބެއިރޫތަށް ދިން ހަމަލާއެއްގައި ފަސް މީހަކު މަރުވެ ގިނަ ބަޔަކު ޒަހަމްވެއްޖެއެވެ.

ލުބުނާނުގެ ޕަބްލިކް ހެލްތު މިނިސްޓްރީއާ ހަވާލަދީ ބޭރުގެ މީޑިޔާތަކުން ރިޕޯޓްކުރާ ގޮތުގައި އިސްރާއީލުން މިފަހަރުގެ ހަމަލާ އަމާޒުކޮށްފައި ވަނީ އެ ގައުމުގެ ވެރިރަށް ބެއިރޫތުގައިވެސް އާންމުން އެންމެ ގިނައިން އެއްވެ އުޅޭ ސަރަހައްދަށެވެ.

މިފަހަރުގެ ހަމަލާއަކީ ފާއިތުވި ދެ ދުވަސް ތެރޭ އިސްރާއީލުން ބެއިރޫތަށް ދިން ތިން ވަނަ ހަމަލާކަން ފާހަގަ ކުރެވެއެވެ.

"ބެއިރޫތުގެ ޒުކާގު އަލް ބްލާތަށް އިސްރާއީލުން ދިން ހަމަލާގައި ފަސް މީހަކު މަރުވެ 24 މީހުން ޒަހަމްވި،" ހޯމަ ދުވަހުގެ ހަމަލާއާ ބެހޭ ގޮތުން މިނިސްޓްރީގެ ބަޔާނެއްގައިވެ އެވެ.

މެދުތެރޭ ބެއިރޫތަށް ދިން ހަމަލާތަކާ ބެހޭ ގޮތުން އިސްރާއީލުން އަދި ވަކި އެއްޗެއް ބުނެފައި ނުވެއެވެ. ނަމަވެސް ލުބުނާނުގައި ހަރަކާތްތެރިވާ ހިޒްބުالله އިން ވަނީ އެ ބެއިރޫތުގެ މި ސަރަހައްދަށް ދިން ވައިގެ ހަމަލާގައި އެ ޖަމާއަތުގެ ތަރުޖަމާނު މުހައްމަދު އަފީފް މަރުވިކަން ކަށަވަރުކޮށްދީފަ އެވެ.

ލުބުނާނުގައި އިސްރާއީލުން ދެމުންދާ ހަމަލާތަކުގައި 3،486 މީހުން މަރުވެ 14،786 މީހުން ޒަޚަމްވެފައިވެއެވެ.