ނިރުބަވެރި އިސްރާއީލުން ލުބުނާނަށް އެއްގަމު މަގުންނާއި ވައިގެ މަގުން ދެމުންގެންދާ ހަމަލާތަކުގައި މިހާތަނަށް 200 އަށް ވުރެ ގިނަ ކުޑަކުދިން މަރުވެފައިވާ ކަމަށް އދ އިން ހާމަކޮށްފިއެވެ.

ލުބުނާނުގެ ހެލްތު މިނިސްޓްރީގެ ތަފާސް ހިސާބުތައް ދައްކާ ގޮތުން ހަނގުރާމަ ފެށުނު ފަހުން 231 ކުޑަކުދިން މަރުވެ 1،330 ކުދިން ވަނީ ޒަހަމްވެފައެވެ.

ފާއިތުވި ދެ މަސް ދުވަހުގެ ތެރޭގައި ލުބުނާނުގައި އިސްރާއީލުގެ ހަމަލާތަކުައި ދުވާލަކު ތިން ކުދިން މަރުވާ ކަމަށް އދ. ގެ ކުޑަކުދިންނާ ބެހޭ އިދާރާ، ޔުނިސެފުން ވަނީ ރިޕޯޓުކޮށްފައެވެ.

ޔުނިސެފްގެ ތަރުޖަމާނު ޖޭމްސް އެލްޑާ ބޭރުގެ މީޑިޔާތަކަށް ދެއްވި އިންޓަވިއުއެއްގައި ވިދާޅުވީ އިސްރާއީލުގެ އަނިޔާވެރިކަން ލުބުނާނުގައި ހައްދު ފަހަނަޅައަޅާ މިންވަރަށް އިތުރުވެ މިހާރު އެއީ އާންމު ކަމަކަށް ވެފައިވާ ކަމަށެވެ.

ނިރުބަވެރި އިސްރާއީލުން މެދުއިރުމަތީގައި ހިންގަމުންދާ ޖަރީމާތަކުގައި ދަނީ ޣައްޒާގެ ކުޑަކުދިންނަށްވެސް ހަމަލާތައް ދެމުންކަން ފާހަގަ ކުރެވެއެވެ. އެގޮތުން އިސްރާއީލުން ޣައްޒާއަށް ހަމަލާދޭން ފެށިފަހުން މިހާތަނަށް 17،400 ކުޑަކުދިން މަރުވެފައިވާ ކަމަށް ފަލަސްތީނުގެ ހެލްތު މިނިސްޓްރީން ހާމަކުރެ އެވެ.

ލުބުނާނުގެ ޕަބްލިކް ހެލްތު މިނިސްޓްރީގެ ތަފާސް ހިސާބުތައް ދައްކާ ގޮތުން އިސްރާއީލުން އެގައުމާ ދެކޮޅަށް ހަނގުރާމަ ފެށުނު ފަހުން މިހާތަނަށް 3،452 މީހުން ވަނީ މަރުވެފައެވެ. އަދި މި ހަމަލާތަކުގައި 14،664 މީހުން ޒަޚަމްވި ކަމަށް މިނިސްޓްރީން ހާމަކުރެއެވެ.