އަވައްޓެރި އިންޑިއާގައި މުސްލިމުންނާމެދު ނަފުރަތު އުފެއްދުމަށް އެގައުމުގެ ބޮޑުވަޒީރު ނަރެންދުރަ މޯދީގެ ޕާޓީ، ބާރަތިޔާ ޖަނަތަ ޕާޓީ (ބީޖޭޕީ) އިން މީސް މީޑިޔާގައި ހިއްސާކުރި ވީޑިއޯ ނަގަން އަންގައިފިއެވެ.

މި ވީޑިއޯ ނަގަން އިންޑިއާގެ ވެރިކަން ކުރާ ބީޖޭޕީ އަށް އަންގާފައި ވަނީ އެގައުމުގެ އިލެކްޝަން ކޮމިޝަނުންނެވެ. މި ވީޑިއޯއިން ފެނިގެން ދަނީ އިންޑިއާގެ ހިންދޫން ދިރިއުޅޭ ގެއަކަށް މުސްލިމުން ވަދެގަނެ އެގޭގައި ދިރިއުޅޭ ފަރާތްތަކަށް އުނދަގޫކޮށް ގެއަށް ވެރިވެގަންނަ މަންޒަރެވެ.

އިންޑިއާގެ އިރުމަތީގެ ޖަރުކަންދު ސްޓޭޓުގައި ކުރިއަށްދިޔަ އިންތިހާބުގެ ކެމްޕޭނެއްގެ ތެރެއިން ހޮނިހިރު ދުވަހު އާންމުކުރި މި ވީޑިއޯއިން ވަނީ މިހާރު ކުރިއަށްދާ ސްޓޭޓް އެސެމްބްލީ އިންތިހާބުގައި ވަރަށް ބޮޑަށް މުސްލިމުންނާމެދު ރުޅިވެރިކަން އުފެދިފަ އެވެ.

މި އިންތިހާބުގެ ފުރަތަމަ ފިޔަވަހީގެ ވޯޓުލުން ކުރިއަށް ގެންގޮސްފައިވަނީ ނޮވެމްބަރު މަހުގެ 13 ވަނަ ދުވަހު ކަމަށާއި ދެވަނަ ފިޔަވަހީގެ ވޯޓުލުން 20 ނޮވެމްބަރުގައި ބޭއްވުމަށް ވަނީ ހަމަޖެހިފައެވެ. އަދި މި އިންތިހާބުގެ ނަތީޖާ އިއުލާންކުރާނީ ނޮވެމްބަރު މަހުގެ 23 ވަނަ ދުވަހު ކަމަށް އިލެކްޝަން ކޮމިޝަނާ ހަވާލަދީ އެގައުމުގެ ނޫސްތަކުން ރިޕޯޓްކުރެއެވެ.

އިންތިހާބާ ދިމާކޮށް ނެރުނު މި ވީޑިއޯ އިޝްތިހާރުގައި އިދިކޮޅު ސަޕޯޓަރެއްގެ ގެއަށް މުސްލިމުން ވަންނަ މަންޒަރު ދައްކުވައިދެއެވެ. ފާޑުކިޔާ ފަރާތްތަކުން ވަނީ ވެރިކަން ކުރާ ބީޖޭޕީން މުސްލިމުންނާއި އެހެން މައިނޯރިޓީ ގްރޫޕްތަކާ މެދު ނަފްރަތު އުފައްދާ ކަމަށް ތުހުމަތުކޮށްފަ އެވެ.