ރާއްޖޭގެ އެކި ހިސާބުތަކުގެ މިސްކިތްތަކުގައި މަސައްކަތްކުރާ އިމާމުންނާއި ޚަޠީބުންނަށް އިސްލާމީ ކަންތައްތަކާ ބެހޭ ވުޒާރާއިން ގައުމީ ފެންވަރުގެ ތަމްރީން ޕްރޮގްރާމެއް ފަށައިފިއެވެ.

މިއީ އިމާމުންނާއި ޚަޠީބުން ތާޒާކުރުމަށް ފަށާފައިވާ ގައުމީ މަޝްރޫއުގެ ދަށުން އަށް އަތޮޅެއްގެ އިމާމުންނަށް ކުރިއަށް ގެންދާ ތަމްރީން ޕްރޮގުރާމެކެވެ. އެގޮތުން މިފަހަރުގެ ޕްރޮގްރާމުގައި ތިލަދުންމަތީ އުތުރުބުރި، ތިލަދުންމަތީ ދެކުނުބުރި، މިލަދުންމަޑުލު އުތުރުބުރި، މާޅޮސްމަޑުލު ދެކުނުބުރި، ފާދިއްޕޮޅު، މާލެއަތޮޅު، އަރިއަތޮޅު އުތުރުބުރި، އަދި އަރިއަތޮޅު ދެކުނުބުރީގެ އިމާމުންނާއި ޚަޠީބުން ވަނީ ބައިވެރިވެފައެވެ.

މިއީ މަހުގެ 28 ވަނަ ދުވަހުގެ ނިޔަލަށް އޮންލައިންކޮށް ކުރިޔަށް ގެންދާ ތަމްރީން ޕްރޮގްރާމެކެވެ.

މިއަދު އިސްލާމީ ކަންތައްތަކާ ބެހޭ ވުޒާރާގައި މި ޕްރޮގްރާމް ފެއްޓެވުމަށް ޚާއްޞަ ރަސްމިއްޔާތެއް ވަނީ ބާއްވާފައެވެ. މި ރަސްމިއްޔާތުގައި ވަޒީރު ޑރ. މުޙައްމަދު ޝަހީމް އަލީ ސައީދު ވަނީ ބައިވެރިވެވަޑައިގެންފައެވެ.

ވަޒީރު ވަނީ އިމާމުން ތާޒާކުރުމާއި، އިމާމުންނަށް އިތުރު ތަމްރީންތައް ދިނުމަކީ ވުޒާރާއިން ވަރަށް އިސްކަމެއް ދެއްވާ ކަމެއް ކަމަށާއި މި ސަރުކާރުން ފުރަތަމަ އަހަރުގެ ތެރޭގައި އިމާމުންނަށް ގިނަ ފުރުސަތުތަކެއް ފަހިކޮށްދެވިފައިވާކަން ފާހަގަ ކުރައްވާފައެވެ.

މިފަދަ ތަމްރީން ޕްރޮގުރާމުންތަކުން ލިބިލައްވާ މަޢުލޫމާތުތަކުގެ ބޭނުން ހިއްޕެވުމަށް ވަޒީރު ޝަހީމް ނަޞޭހަތްތެރިވެލެއްވިއެވެެ.

އިސްލާމީ ކަންތައްތަކާ ބެހޭ ވުޒާރާއިން ވަނީ މިއަހަރުގެ މިހާތަނަށް 11 އަތޮޅެއްގެ އިމާމުންނަށް ތަމްރީން ޕްރޮގުރާމް ކުރިއަށް ގެންގޮސްފައެވެ.

މިއަދު ފެށި ތަމްރީން ޕްރޮގުރާމް ހިމެނޭހެން 739 އިމާމުންނާއި ޚަޠީބުން ތަމްރީން ކުރެވިފައިވާކަން ފާހަގަކޮށްލެވެއެވެ.