ބޮލީވުޑުގެ މަޝްހޫރު ފިލްމު ޑައިރެކްޓަރު ކަބީރު ޚާން އާއެކު އަނެއްކާވެސް ސަލްމާން ޚާން ފިލްމެއް އުފައްދަން އުޅޭ ކަމަށް މީޑިއާ ތަކުން ރިޕޯޓު ކޮށްފިއެވެ.

އީޓައިމްސްގެ ރިޕޯޓެއްގައި ބުނެފައިވަނީ ފިލްމު ޑައިރެކްޓަރު ކަބީރު ޚާން އާ ފިލްމެއް އުފެއްދުމުގެ މަސައްކަތް ފަށާފައިވާ ކަމަށެވެ. އަދި ކަބީރު ދެކޭގޮތުގައި ފިލްމުގެ ލީޑުން ފެނުން އެންމެ ރަނގަޅުވާނީ ސަލްމާނު ފަދަ ސުޕަސްޓާރެއް ކަމަށްވެސް ރިޕޯޓުގައި ވެއެވެ.

ރިޕޯޓުގައި އިތުރަށް ބުނެފައިވަނީ މި ޕްރޮޖެކްޓާ ގުޅޭ ގޮތުން ސަލްމާނު އާއި ކަބީރު ބައްދަލުވެފައިވާ ކަމަށެވެ. ނަމަވެސް އަދި ސަލްމާން ޚާން އެފިލްމު ކުޅޭނެކަމަށް ނިންމާފައި ނުވާކަމަށް ރިޕޯޓުގައި ވެއެވެ.

ސަލްމާން މިހާރު މަޝްއޫލުވެ އުޅެނީ އޭނާގެ ކުރިއަށް އޮތް ފިލްމު "ސިކަންދަރު" ގެ ޝޫޓުތައް ކުރުމުގައެވެ. އަދި އެއަށްފަހު އޭނާ ދެން ފަށާނީ ޑައިރެކްޓަރު އަޓްލީ އާއެކު އުފައްދަން ހަމަޖެހިފައިވާ ފިލްމުގެ މަސައްކަތެވެ. އެހެންކަމުން ސަލްމާން، ޑިރެކްޓަރ ކަބީރުގެ ޕްރޮޖެކްޓުގައި މަސައްކަތް ކުރަން ނިންމިނަމަވެސް، މި ޕްރޮޖެކްޓުގެ މަސައްކަތް ފެށޭނީ އަންނަ އަހަރުގެ ފަހުކޮޅުގައެވެ.

ސަލްމާނު އާއި ކަބީރު ވަނީ މީގެ ކުރިންވެސް އެކުގައި ހިޓު ފިލްމުތަކެއް އުފައްދާފައެވެ. އޭގެ ތެރޭގައި "އޭކް ތާ ޓައިގާ" އާއި "ބަޖްރަންގީ ބައިޖާން" ހިމެނެއެވެ.