މިމަހު 5 ގައި ނެރުނު އައްލޫ އަރުޖުންގެ ފިލްމު "ޕުޝްޕާ 2" އެޅުވި ތިއޭޓަރެއްގެ ތެރެއަށް ގޮތް ނޭނގޭ ސްޕްރޭއެއް ދޫކުރި މައްސަލައެއް މިހާރު މުމްބާއީގެ ފުލުހުން ބަލަން ފަށައިފިއެވެ.

މި ހާދިޘާ ހިނގާފައިވަނީ މުމްބާއީގެ ޖީ7 ތިއޭޓަރުގައެވެ. ރިޕޯޓުތައް ބުނާ ގޮތުގައި މި ތިއޭޓަރުގައި މިމަހު 5 ގެ ރޭގަނޑު އެޅުވި ފިލްމުގެ އިންޓަވަލް ވަގުތު ކޮޅުގައި މީހަކު ވަނީ ގޮތް ނޭނގޭ ސްޕްރޭ އެއް ތިއޭޓަރަށް ދޫކޮށްފައެވެ. އަދި މި ސްޕްރޭގެ ސަބަބުން އޯޑިއަންސްގަ ތިބި މީހުންނަށް އެކިކަހަލަ އުނދަގޫތައް ކުރިމަތިވި ކަމަށްވެސް ރިޕޯޓުތައް ބުނެއެވެ.

ފިލްމު ބަލަން ގޮސް ތިބި މީހުން އެތާގައި ތިބި މީޑިއާތަކާ ވާހަކަ ދައްކަމުން ބުނެފައިވަނީ އިންޓަވަލް ވަގުތުކޮޅަށްފަހު ތިއޭޓަރަށް ވަނުމުން، އެތާނގައި ހުރި ވަސް ޖެހިފައި ވަރަށް ގިނަ މީހުންގެ ކަރަށް އުނދަގޫތަކެއްވެ، ކެއްސައި ހޮޑު ލެވުނު ކަމަށެވެ. އަދި އެކަމުގެ ސަބަބުން 10 ވަރަކަށް މިނެޓު ވަންދެން ފިލްމު މެދުކަނޑާލައި ތިއޭޓަރުގެ ދޮރުތައް ހުޅުވަން ޖެހުނު ކަމަށްވެސް އެމީހުން ވަނީ ބުނެފައެވެ.

މި ހާދިޘާ ކުރިމަތި ވުމާއެކު ފުލުހުން ސީނަށް ގޮސް، އެ ސްޕްރޭ ކުރި މީހާ ހޯދުމަށް ސީސީޓީވީ ފޫޓޭޖު ބަލާފައިވާ ކަމަށް ރިޕޯޓުތައް ބުނެއެވެ. އަދި މިހާރު މުމްބާއީ ފުލުހުން ދަނީ މި މައްސަލަ އިތުރަށް ތަހުގީގު ކުރަމުންނެވެ.

އައްލޫ އަރުޖުން ލީޑުން ފެންނަ މި ފިލްމު ނެރުނީ މިމަހު 5 ގައެވެ. މި ފިލްމަށް އާންމުންގެ ބޮޑު ތަރުހީބެއް ލިބިފައިވާއިރު، މި ފިލްމު ބަލަން އުޅުމުގެ ތެރޭގައި ހިނގައިދިޔަ 2 ހާދިޘާއެއްގައި ދެމީހަކު ވަނީ ފިލްމު ނެރުނު ދުވަހު މަރުވެފައެވެ.

އޭގެ ތެރެއިން އެކަކު މަރުވީ ތިއޭޓަރުގައި އައްލޫ އަރުޖުން ބެލުމަށް މީހުންތައް އެއްވާން ފެށި ވަގުތު އޭނާގެ ދަރިން ސަލާމަތް ކުރަން އުޅުމުގެ ތެރޭގައި ކަމަށް ރިޕޯޓުތައް ބުނެއެވެ. އަދި އަނެއް މީހާ މަރުވީ ޕުޝްޕާ 2 އަޅުވާތީ ސިނަމާއަށް ދާން ދުވެފައި ދަނިކޮށް ރޭލެއްގައި ޖެހިގެން ކަމަށްވެސް ރިޕޯޓުތައް ބުނެއެވެ.

ހިންދީ ހިމެނޭ ގޮތަށް އެކި ބަހުރުވައިން ނެރުނު މި ފިލްމަކީ މިއަހަރު ބޮކްސް އޮފީހުގައި ނެރުނު ފިލްމު ތަކުގެ ތެރެއިން އެންމެ ބޮޑު އާމްދަނީއެއް ލިބޭނެ އެއް ފިލްމު ކަމަށް ފިލްމުގެ އުފެއްދުންތެރިން ވަނީ އަންދާޒާކޮށްފައެވެ.