އައްޑޫސިޓީ ހިތަދޫގައި ހުންނަ ޕޮލިސް އެކަޑަމީގެ މަރާމާތަށް އަވައްޓެރި އިންޑިޔާއިން 8.5 މިލިއަން ރުފިޔާ ދީފިއެވެ.

އައްޑޫ ސިޓީގައި ތަރައްގީކޮށްފައިވާ ނޭޝަނަލް ކޮލެޖް އޮފް ޕޮލިސިންއެންޑް ލޯ އެންފޯސްމަންޓަކީ އިންޑިޔާގެ އެހީގައި ތަރައްގީކޮށްފައިވާ ތަނެއްކަން ފާހަގަ ކުރެވެއެވެ.

ފުލުހުންގެ 37 ވަނަ އަސާސީ ތަމްރީން ކޯހުގެ ދަސްވެނިވުމަށް ޕޮލިސް ކޮލެޖްގައި ބޭއްވި ރަސްމިއްޔާތުގައި ވާހަކަފުޅު ދައްކަވަމުން ދާހިލީ ސަލާމަތާއި ފަންނިޔަތާއި ބެހޭ ވަޒީރު އަލީ އިހުސާން ވަނީ އިންޑިޔާއިން އެ ކޮލެޖުގެ މަރާމާތަށް ފައިސާގެ އެހީ ދީފައިވާކަން އިއުލާން ކުރައްވާފައެވެ.

މި ރަސްމިއްޔާތުގައި ވާހަކަ ދައްކަވަމުން މިނިސްޓަރ ވަނީ ފުލުހުންގެ ހިދުމަތާއި އަދި ގާނޫނު ތަންފީޒު ކުރާ އިދާރާތަކުގެ ކުރިއެރުވުމަށް ފާއިތުވެދިޔަ އަހަރުތަކުގައި ގައުމުތަކުން ވެދެއްވި އެހީތެރިކަން ފާހަގަކުރައްވާ ކަމަށްވެސް ވިދާޅުވެފައެވެ.

ފުލުހުންގެ މި ދަސްވެނިވުމުގެ ރަސްމިއްޔާތުގައި އިންޑިޔާގެ ހައިދަރްބާދުގައި ހުންނަ ނޭޝަނަލް ޕޮލިސް އެކަޑަމީ އޮފް އިންޑިއާގެ ޑިރެކްޓަރ އަމިތް ގަރްގް ވެސް ބައިވެރިވަޑަައިގެންނެވިއެވެ.

އައްޑޫގައި ތަރައްގީކޮށްފައިވާ މި އެކަޑަމީ އަކީ ކުރީގެ ރައީސް އަބްދުﷲ ޔާމީންގެ ސަރުކާރުގައި އިމާރާތް ކުރި ތަނެކެވެ. މި ތަން އެއްކޮށް ނިމި ރަސްމީކޮށް ހުޅުވާފައި ވަނީ މާރިޗް 2022 ވަނަ އަހަރުގެ 27 ގައެވެ.