ހާލުގައި ޖެހިފައިވާ ޣައްޒާގެ ރައްޔިތުންނަށް އިންސާނީ އެހީ ހިފައިގެން ދިޔަ އުޅަނދަކަށް ނިރުބަވެރި އިސްރާއީލުން ހަމަލާދީ 12 މީހުން މަރާލައިފިއެވެ.

ނިރުބަވެރިންގެ މި ހަމަލާގައި 30 މީހުންނަށް އަނިޔާވެފައިވާއިރު، އޭގެ ތެރޭގައި ހާލު ސީރިއަސް ބައެއް މީހުން ހިމެނެއެވެ. މި ހަމަލާ އަމާޒުކޮށްފައި ވަނީ އެހީގެ ކޮންވޯއީ ރައްކާތެރި ކުރުމުގެ މަސައްކަތް ހަވާލުކޮށްފައިވާ ސިވިލް ގާޑުންނަށް ކަމަށް އޮފިޝަލުން މައުލޫމާތު ދެއެވެ.

މި ހަމަލާއަކީ އިސްރާއީލުގެ ލާއިންސާނީ ސިފައިން އިންސާނީ އެހީގެ މަސައްކަތްތެރިންނާއި ކޮންވޯއީތަކާއި ހަނގުރާމަވެރިންގެ އަމާޒަކަށް ވެފައިވާ ޣައްޒާގެ ރައްޔިތުންނަށް ކާބޯތަކެތީގެ ދަތިކަން އިތުރަށް ކުރިމަތިކުރުމަށް ދިން ހަމަލާއެކެވެ.

މީގެ ކުރިންވެސް ނިރުބަވެރިންގެ މިފަދަ ހަމަލާތަކުގައި އެހީދޭ ފަރާތްތަކާއި އާންމުންވެސް ވަނީ މަރުވެފައެވެ. އެގޮތުން ފާއިތުވި ހަފްތާގެ ހުކުރު ދުވަހުގެ ރޭ ޣައްޒާގެ ދެކުނުގައި އޮންނަ ރަފާއަށް އިސްރާއީލުން ދިން ހަމަލާއެއްގައި ފުށް ގަތުމަށް ސަފު ހަދައިގެން ތިބި ފަލަސްތީނުގެ އާންމުންނަށް ދިން ހަމަލާއެއްގައި ދިހަ މީހަކު ވަނީ މަރުވެފަ އެވެ.

އެހީގެ ޝިޕްމަންޓެއް ހިމާޔަތް ކުރަމުންދިޔަ ސެކިއުރިޓީ ގާޑުންނަށް އެންމެ ފަހުން ދިން ހަމަލާއާ ގުޅޭ ގޮތުން އިސްރާއީލުގެ އަސްކަރިއްޔާއިން އަދި އެއްޗެއް ބުނެފައެއް ނުވެ އެވެ.

ޣައްޒާގެ ހެލްތު މިނިސްޓްރީން ބުދަ ދުވަހު ނެރުނު ބަޔާނެއްގައި ބުނެފައިވަނީ 2023 ވަނަ އަހަރުގެ އޮކްޓޯބަރު މަހުގެ ހަތް ވަނަ ދުވަހުން ފެށިގެން އިސްރާއީލުން ޣައްޒާގެ ސަރަހައްދުގައި ކުރިއަށްދާ ހަނގުރާމައިގައި 44،805 ފަލަސްތީނު މީހުން މަރުވެ 106،257 މީހުން ޒަޚަމްވެފައިވާ ކަމަށެވެ.