"ހައުސްފުލް 5" ގެ ސެޓުގައި ބޮލީވުޑްގެ ތަރި އަކްޝޭ ކުމާރުގެ ލޮލަށް ޒަހަމުތަކެއް ލިބިއްޖެ ކަމަށް މީޑިއާތަކުން ރިޕޯޓު ކޮށްފިއެވެ.

އިންޑިއާގެ އީޓައިމްސް ނޫހުގައިވާ ރިޕޯޓެއްގައި ބުނެފައިވަނީ މިހާރު އަކްޝޭ ޝޫޓު ކުރަމުންދާ ފިލްމު "ހައުސްފުލް 5" ގެ ޝޫޓިންގެ ތެރޭގަައި އޭނާގެ ލޮލަށް ޒަހަމްތަކެއް ލިބިފައިވާ ކަމަށެވެ. އެގޮތުން އޭނާގެ ލޮލަށް ޒަހަމް ވެފައިވަނީ ފިލްމުގެ ޝޫޓިންގެ ތެރޭގައި ސްޓަންޓެއް ޖައްސަނިކޮށް ކަމަށްވެސް ރިޕޯޓުގައި ވެއެވެ.

މި ހާދިޘާ ދިމާވުމާއެކު ފިލްމު ސެޓަށް ލޮކުގެ ހާއްސަ ޑޮކްޓަރެއް ގެންގޮސް، އަކްޝޭ އަށް ފަރުވާ ދީފައިވާ ކަމަށް ރިޕޯޓުގައި ވެއެވެ. އަދި މި ހާދިޘާގެ ސަބަބުން އަކްޝޭ މިހާރު ޝޫޓިން މެދުކަނޑާލާފައިވާއިރު، ފަރުވާއަށްފަހު އޭނާ ވީހާވެސް އަވަހަށް އެނބުރި ޝޫޓިން އަށް ދާނެ ކަމަށް ރިޕޯޓުތައް ބުނެއެވެ.

"ހައުސްފުލް 5" ގެ ޝޫޓުތައް ފަށާފައިވަނީ މިއަހަރު ކުރީކޮޅު ޔޫރަޕުގައެވެ. މި ފިލްމުގެ ތަރިންގެ ތެރޭގައި އަކްޝޭގެ އިތުރުން އަބިޝެކް، ރިތޭޝް، ފަރްދީން ޚާން އަދި ސަންޖޭ ދަތު ފަދަ މަޝްހޫރު ތަރިން ހިމެނެއެވެ. މި ފިލްމުގެ އެންމެ ފަހުގެ ޝޫޓުތައް މިހާރު ކުރިއަށް ދާއިރު، މި ފިލްމު ނެރުމަށް ހަމަޖެހިފައިވަނީ އަންނަ އަހަރު ޖޫން 6 ގައެވެ.