ނިރުބަވެރި އިސްރާއީލުން ސީރިޔާއަށް ދެމުންގެންދާ ހަމަލާތައް ހުއްޓާލަން އދ. އިން ގޮވާލައިފިއެވެ.

އދ. ގެ ޗީފް އެންޓޯނިއޯ ގުޓަރޭސް ވަނީ އިސްރާއީލުން ދޭ ހަމަލާތަކާ މެދު ވަރަށް ބޮޑަށް ކަންބޮޑުވެވަޑައިގަންނަވާ ކަމަށް ވިދާޅުވެ މި ހަމަލާތައް ވަގުތުން ވަގުތަށް ހުއްޓާލުމަށް ގޮވާލައްވާފައެވެ. މީގެ ކުރިންވެސް އޭނާ ވަނީ މެދުއިރުމަތީގެ އެހެން ގައުމުތަކުގައި އިސްރާއީލުން ހިންގަމުންގެންދާ ލާއިންސާނީ އަމަލުތައް ހުއްޓާލުމަށް އެތައް ފަހަރެއްގެ މަތިން ގޮވާލައްވާފައެވެ.

އެންޓޯނިއޯ ގުޓަރޭސް އަކީ އިސްރާއީލުގެ ދިފާއުގައި ވާހަކަ ދައްކަވާ ބޭފުޅެއް ނޫންކަމަށް އެގައުމުން ވަނީ މީގެ ކުރިން ބުނެފައެވެ. ނަމަވެސް އޭނާ އާ ހިލާފަށް އދ. ގެ އާންމު މަޖިލީހުގެ ސެކިއުރިޓީ އެޑްވައިޒަރު ޖޭކް ސުލިވާން ވަނީ ސީރިއާގެ ސައިޓްތަކަށް އިސްރާއީލުން ދޭ ފުޅާ ހަމަލާތައް ދިފާއުކޮށް ވާހަކަ ދައްކަވާފައެވެ.

ޖޭކް ސުލިވާން ވިދާޅުވީ ސީރިޔާގައި އިސްރާއީލުގެ ސިފައިން މަސައްކަތް ކުރަނީ ކުރިމަތިވެދާނެ ނުރައްކާތައް "ނިއުޓްރަލް" ކުރަން ކަމަށެވެ. ނަމަވެސް އޭނާ މިފަދައިން ވިދާޅުވިއިރު އިސްރާއީލުގެ ހަމަލާތަކުގައި މިހާރުވެސް ސީރިޔާގެ އެތައް ބަޔަކު މަރުވެ އެތައް އިމާރާތަކަށް ވަނީ ގެއްލުންވެފައެވެ.

ސީރިޔާގައި ހިނގަމުންދާ މައްސަލައާއި ގުޅިގެން ޖޯޑަންއިން ވަނީ މި ހަފްތާ ބަންދުގައި ސީރިއާއާ ގުޅޭ ކްރައިސިސް ސަމިޓެއް ބާއްވާން ނިންމާފައެވެ. މި ސަމިޓުގައި ސައުދީ އަރަބިއްޔާ، އިރާގު، ލުބުނާން، މިސްރު، ޔޫއޭއީ، ބަހްރެއިން، ގަތަރު، ތުރުކީ، އެމެރިކާ، ޔޫރަޕިއަން ޔޫނިއަން އަދި އދ. ބައިވެރިވާނެ ކަމަށް މައުލޫމާތު ލިބެއެވެ.