ތިރީސް އަހަރު ކުރިން ބޭރު ފައިސާއާ ބެހޭ ގާނޫނު ހަދާފައި އޮތް ނަމަ ރާއްޖެ ވެގެންދާނީ މި ސަރަހައްދުގެ އެންމެ މުއްސަނދި ގައުމަށް ކަމަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.

ރިސޯޓުތަކާއި ގެސްޓު ހައުސްތަކަށް ވަންނަ ބޭރު ފައިސާ މާރުކުރަން ޖެހޭ ގޮތަށް ހުށަހެޅި ބޭރު ފައިސާއާ ބެހޭ ބިލު ރައްޔިތުންހެ މަޖިލީހުން ފާސްކުރީ އިއްުެޔެ އެވެ.

ރޭ ޕީއެސްއެމްއިން ގެނެސްދިން ޕްރޮގްރާމެއްގައި މަޖިލީހުގެ ރައީސް އަބްދުއް ރަހީމް ވިދާޅުވީ އެ ބިލު ފާސްކުރީ ކަމާ ބެހޭ ފަރާތްތަކާއެކު މަޝްވަރާކުރުމަށް ފަހު ކަމަށެވެ. އަދި އެ ފަރާތްތަކުން އެދިވަޑައިގެންނެވި ގިނަ ކަންތައްތައް އޮންނާނީ ހައްލުކޮށްދީފައި ކަމަށް ވެސް އަބްދުއްރަހީމް ވިދާޅުވި އެވެ.

ޑޮލަރުގެ ރަސްމީ ރޭޓް 15.42 ގައި ހުރި ނަމަވެސް ކަޅުބާޒާރުގައި މިހާރު ޑޮލަރުގެ އަގު އުޅެނީ 20 ރުފިޔާއާ ކައިރީގަ އެވެ. އަދި ރާއްޖޭގެ ބޭރު ފައިސާގެ ރިޒާވްވެސް ފަހަކަށް އައިސް ދަށްވަމުންދާކަން ފާހަގަކުރެވެއެވެ.

އެކަން ފާހަގަކުރައްވައި އަބްދުއް ރަހީމް ވިދާޅުވީ އެ ހާލަތުން އަރައިގަތުމަށް ބޭރު ފައިސާއާ ބެހޭ ގާނޫނެއް ގެންނަން ރައީސް ޑރ. މުހައްމަދު މުއިއްޒުއަށް މަޖުބޫރުވެވަޑައިގެންނެވީ ކަމަށެވެ.

"އަޅުގަނޑު ދަންނަވާނީ، މިއީ މީގެ ތިރީހަކަށް އަހަރު ކުރިން ފާސްކޮށްފައި އޮންނަންޖެހޭ ގާނޫނެކޭ. އެ ގާނޫނު މީގެ ތިރީހަކަށް އަހަރު ދުވަސް ކުރިން ފާސްކޮށްފައި އޮތްނަމަ، ދިވެހިރާއްޖެ ވެގެންދާނީ މި ސަރަހައްދުގެ އެންމެ މުއްސަނދި އެއް ގައުމަށް،" އަބްދުއްރަހީމް ވިދާޅުވިއެވެ.

އޭގެ އިތުރުން 30 އަހަރު ކުރިން ގާނޫނު އެގޮތަށް ފާސްކޮށްފައި އޮތްނަމަ ރާއްޖެއަކީ ބޭރު ފައިސާގެ ވަރުގަދަ ރިޒާވެއް އޮތް ގައުމަކަށް ވެގެންދިޔައީސް ކަމަށް އަބްދުއް ރަހީމް ވިދާޅުވި އެވެ.

ހަމަ އެހެންމެ އެ ގޮތަށް ގާނޫނު ހަދާފައި އޮތް ނަމަ އެމްޑީޕީގެ އެންމެ ފުރަތަމަ ވެރިކަން ފެށުމުގެ ކުރިން ޑޮލަރުގެ ރޭޓް އޮތް ވަރަށް ވުރެ ވެސް ދަށަށް ޑޮލަރު ރޭޓް ގެންދިއުމުގެ ފުރުސަތުވެސް އޮތް ކަމަށް އަބްދުއްރަހީމް ވިދާޅުވި އެވެ.