ސީރިޔާގެ ދިމިޝްގުގައި މިނިވަންކަމުގެ އުފާފާޅުކުރަމުންދިޔަ ބަޔަކަށް އަމާޒުކޮށް އިސްރާއީލުން ހަމަލާދީފިއެވެ.

އަލްޖަޒީރާއިން ބުނީ ހުކުރު ދުވަހުގެ ރޭ ސީރިއާގެ ވެރިރަށުގައި ހުންނަ އެގައުމުގެ ސިފައިންގެ މަރުކަޒެއް ކައިރީގައިވާ ރާޑަރު ބެޓޭލިއަނަކަށް އިސްރާއީލު ސިފައިން ވައިގެ ހަމަލާއެއް ދީފައިވާ ކަމަށެވެ.

ނިރުބަވެރިންގެ މި ހަމަލާގައި މީހަކު މަރުވިކަމެއް ނުވަތަ ޒަހަމްވީ ކިތައް މީހުން ކަމެއް އެއްވެސް އިދާރާއަކުން އަދި ހާމަނުކުރެއެވެ.



ރައީސް ބައްޝާރުލް އަސަދުގެ ވެރިކަން ވެއްޓުމާ ގުޅިގެން ލިބުނު މިނިވަންކަން ފާހަގަ ކުރުމަށް ގާތްގަނޑަކަށް ދިހަހާހަކަށް މީހުން ހުކުރު ދުވަހު ދިމިޝްގުގެ މަގުތަކާއި އެހެން ބޮޑެތި ސިޓީތަކުގެ މަގުތަކަށް ވަނީ ނުކުމެފަ އެވެ.

އަސަދުގެ ވެރިކަން ވެއްޓުމާއެކު އިސްރާއީލާއި އެމެރިކާއިން ވަނީ ސީރިޔާ އަށް ހަމަލާތައް ދޭން ފަށައިފައެވެ. ދެ ގައުމުން ވެސް ހަމަލާތައް ދެނީ ސީރިޔާގައި ހަރަކާތްތެރިވާ ހަތިޔާރު އެޅި ހަނގުރާމަވެރިންނަށް އަމާޒުކޮށް ކަމަށް އެ ގައުމުތަކުން ވަނީ ބުނެފައެވެ.

ސީރިޔާގެ މިހާރުގެ ހާލަތާއި ގުޅިގެން އުރުދުންގައި ކުއްލި ސަމިޓެއް ބާއްވަން ވެސް ވަނީ ހަމަޖެހިފައެވެ. އެ ސަމިޓުގައި ސައުދީ އަރަބިއްޔާ، އިރާގު، ލުބުނާން، މިސްރު، ޔުނައިޓެޑް އަރަބް އެމިރޭޓްސް، ބަހްރެއިން، ގަތަރު، ތުރުކީ، އެމެރިކާ، ޔޫރަޕިއަން ޔޫނިއަން އަދި އދ. އިން ބައިވެރި ވާނެ ކަމަށް މައުލޫމާތު ލިބެއެވެ.