ހުކުރުދުވަހު ފުލުހުންގެ ބެލުމުގެ ދަށަށް ގެންދިޔަ ތެލަގޫ ތަރި އައްލޫ އަރުޖުން ބަންދުން ދޫކޮށްލައިފިއެވެ.

އޭނާ ބަންދުން ދޫކޮށްފައިވަނީ އިއްޔެ ހެނދުނުގެ ވަގުތެއްގައެވެ. އައްލޫ އަރުޖުން ހައްޔަރު ކުރީ އޭނާގެ ފިލްމު "ޕުޝްޕާ 2" އެޅުވި ތިއޭޓަރުގައި ހިނގައިދިޔަ ހިތާމަވެރި ހާދިޘާއެއްގައި އަންހެނަކު މަރުވުމުގެ ސަބަބުން އެ އަންހެން މީހާގެ ފިރިމީހާ ފުލުހަށް މައްސަލަ ޖެއްސުމުންނެވެ.

ބަންދުން ދޫކޮށްލުމުން އައްލޫ އަރުޖުން ވަނީ މި ހާދިޘާއާ ގުޅިގެން ފުރަތަމަ ފަހަރަށް މީޑިއާ ތަކާ ވާހަކަ ދައްކައި ސްޓޭޓްމެންޓެއް ނެރެފައެވެ. އެގޮތުން އޭނާ ބުނެފައިވަނީ އެ ތިއޭޓަރުގައި ހިނގައިދިޔައީ ވަރަށް ހިތާމަވެރި ހާދިޘާއެއް ކަމަށާއި، އެއީ އޭނާއަށް ކޮންޓްރޯލު ކުރެވޭނެ ކަމެއް ނޫން ކަމަށެވެ.

އަދި އޭނާއަކީ ގާނޫނާއި ގަވާއިދަށް ހުރުމަތްތެރިކޮށް ހިތާ މީހެއް ކަމަށާއި، މި ހާދިޘާ އާއި ގުޅިގެން ކުރަން ޖެހޭ ތަހުގީގަށް، ގާނޫނާ އެއްގޮތަށް ކަންކަން ކުރިއަށް ގެންދިއުމަށް އެއްބާރުލުން ދޭނެ ކަމަށްވެސް އޭނާ ވަނީ ބުނެފައެވެ. އަދި އެ އަންހެން މީހާގެ އާއިލާއަށް ލިބުނު ހިތާމާގައި ބައިވެރިވާ ކަމަށާއި، އެ އާއިލާއަށް ބޭނުންވާ ކޮންމެ އެހީއެއްވެސް ފޯރުކޮށްދޭން ތައްޔާރަށް ހުރި ކަމަށްވެސް އައްލޫ އަރުޖުން ވަނީ ބުނެފައެވެ.

މި ހާދިޘާ ހިނގާފައިވަނީ މިމަހު 4 ގައި ހައިދްރަބާދުގެ ސަންދިޔާ ތިއޭޓަރުގައެވެ. އަދި މި މައްސަލައިގެ ސަބަބުން އައްލޫ އަރުޖުންގެ އިތުރުން ތިއޭޓަރުގެ ވެރިފަރާތާއި، ޖެނެރަލް މެނޭޖަރު އަދި ސެކިއުރިޓޫ މެނޭޖަރުވެސް ވަނީ ހައްޔަރު ކޮށްފައެވެ.