އިންޑިއާގެ ސަގާފަތާ ގުޅިފައިވާ ފިލްމެއް ކަމަށްވާ "މަހާބާރަތު" އުފެއްދުމަށް ޖެހިލުންވެ ބިރުގައްނަ ކަމަށް ބޮލީވުޑްގެ މަޝްހޫރު ތަރި އަދި ފިލްމު އުފެއްދުންތެރިޔާ އާމިރު ޚާން ބުނެފިއެވެ.

އޭނާ މިހެން ބުނެފައިވަނީ ދާދި ފަހުން ދިން އިންޓަވިއުއެއްގައި އޭނާ މިހާރު އުފައްދަން އުޅޭ އަދި އޭނާގެ ޑްރީމް ޕްރޮޖެކްޓު ކަމުގައިވާ "މަހާބާރަތު" އާ ބެހޭ ގޮތުން ވާހަކަ ދައްކަމުންނެވެ. މި ޕްރޮޖެކްޓާ ބެހޭ ގޮތުން އޭނާ ބުނެފައިވަނީ މި ފިލްމު އުފައްދަން ޖެހިލުންވާ ކަމަށާއި ކޮންމެވެސް ވަރަކަށް ޕްރޮޖެކްޓާ ގުޅިގެން ހިތުގައި ބިރުވެސް އުފެދުނު ކަމަށެވެ.

އެގޮތުން އޭނާ ބުނެފައިވަނީ މަހާބާރަތު ގެ ވާހަކައަކީ އިންޑިއާގެ އެންމެންގެވެސް ދިރިއުޅުމާ ވަރަށް ގާތް ވާހަކަ އެއް ކަމަށާއި، އޭގެ އެންމެ ފުރިހަމަ ގޮތުގައި އެ ގެނެސް ނުދެވިދާނެތީ އެކަމުގެ ސަބަބުން ހިތުގައި ބިރު އުފެދޭ ކަމަށެވެ. އަދި މި ޕްރޮޖެކްޓަކީ އިންޑިއާގެ އެންމެންވެސް ފަހުރުވެރިވާ ފަދަ ޕްރޮޖެކްޓަކަށް ހަދަން ބޭނުންވާތީ އެ ޕްރެޝަރު އޮތް ކަމަށްވެސް އާމިރު ވަނީ ބުނެފައެވެ.

އާމިރު އިތުރަށް ބުނެފައިވަނީ މި ޕްރޮޖެކްޓަކީ ތަފާތު އެކިކަހަލަ ހިޔާލީ ކަންތައްތައް ހިމަނައިގެން އުފައްދާ ފިލްމެއް ކަމުން އެހެން ފިލްމުތަކާ ތަފާތު ވާނެ ކަމަށާއި، އެކަމަށްވެސް ވަރަށް ވަގުތު ދާނެ ކަމަށެވެ. އަދި މިހާރު އޭނާ މަސައްކަތް ކުރަމުންދާ ޕްރޮޖެކްޓަށް ފަހު "މަހާބާރަތު" ގެ މަސައްކަތް ވެސް ފަށާނެ ކަމަށް އޭނާ ވަނީ ބުނެފައެވެ.

އާމިރު މިހާރު މަސައްކަތް ކުރަމުން ދަނީ އޭނާގެ ފިލްމު "ސިތާރޭ ޒަމީން ޕަރް" ނެރުމަށެވެ. މި ފިލްމުގެ އެންމެ ފަހުގެ ޝޫޓުތައް މިހާރު ނިމިފައިވާއިރު، މި ފިލްމު އަންނަ އަހަރު މެދުތެރޭގައި ނެރޭނެ އެވެ.