ބޮލީވުޑްގެ މަޝްހޫރު ތަރި އަކްޝޭ ކުމާރުގެ ކުރިއަށް އޮތް ފިލްމު "ސްކައި ފޯސް" ގެ ޝޫޓިން ނިންމާލައިފިއެވެ.

ބޮލީވުޑް ހަންގާމާގައިވާ ރިޕޯޓެއްގައި ބުނެފައިވަނީ އަކްޝޭގެ ފިލްމު "ސްކައި ފޯސް" ގެ އެންމެ ފަހުގެ ޝޫޓުތައް ނިމިފައިވާ ކަމަށާއި، އެންމެ ފަހުން ޝޫޓު ކޮށްފައިވަނީ މި ފިލްމުގެ ހާއްސަ ލަވައެއް ކަމަށެވެ. މި ފިލްމުގެ ވާހަކަ ބިނާވެފައިވަނީ 1960 އާއި 1970 އާއި ދެމެދު ހިނގައިދިޔަ އިންޑޯ-ޕެކް މައްސަލައިގެ މައްޗަށް ކަމަށް ރިޕޯޓުގައި ވެއެވެ.

މި ފިލްމު ޝޫޓު ކޮށްފައިވަނީ ތަފާތު އެކި ތަންތަނުގައެވެ. އެގޮތުން މި ފިލްމު ޝޫޓު ކޮށްފައިވާ ތަންތަނުގެ ތެރޭގަައި މުމްބާއީ، ލަކްނައު، ސިތާޕޫރު، އަމްރިސްތަރު، ހައިދްރަބާދު، ދިއްލީ، ޕަޓާންކޮޓު އަދި އިނގިރޭސި ވިލާތުގެ އިތުރުން މަސޫރީވެސް ހިމެނެއެވެ.

މެޑޮކް ފިލްމްސް އާއި ޖިއޯ ސްޓޫޑިއޯސް އަދި އަމަރު ކޯޝަކު ގުޅިގެން އުފައްދާ މި ފިލްމުގެ ތަރިންގެ ތެރޭގައި އަކްޝޭގެ އިތުރުން ޑެބިއުޓެންޓު ތަރި ވީރް އާއި، ސާރާ އަލީ ޚާންވެސް ހިމެނެއެވެ. އެތައް ބަޔަކު އިންތިޒާރު ކުރަމުންދާ މި ފިލްމު ނެރުމަށް ހަމަޖެހިފައިވަނީ އިންޑިއާގެ ޖުމުހޫރީ ދުވަހާ ދިމާކޮށް އަންނަ އަހަރު ޖެނުއަރީ 24 ގައެވެ.