ބޮލީވުޑްގެ މަޝްހޫރު ތަރި އަދި ފިލްމު އުފެއްދުންތެރިޔާ އާމިރު ޚާން އުފެއްދި ފިލްމު "ލާޕަތާ ލޭޑީސް" އޮސްކާ އެވޯޑުގެ ރޭހުން ބޭރުވެއްޖެއެވެ.

ބޮލީވުޑް ހަންގާމާގައިވާ ރިޕޯޓެއްގައި ބުނެފައިވަނީ އިއްޔެގެ ވަގުތެއްގައި އޮސްކާސް ގެ އެންމެ މޮޅު އިންޓަނޭޝަނަލް ފިލްމު ކެޓެގަރީއަށް ޝޯޓް ލިސްޓު ވެފައިވާ ފިލްމުތަކުގެ ލިސްޓެއް ނެރެފައިވާ ކަމަށެވެ. ނަމަވެސް މި ލިސްޓުން އިންޑިއާގެ އޮފިޝަލް އެންޓްރީ ކަމަށްވާ "ލާޕަތާ ލޭޑީސް" އަށް ޖާގައެއް ލިބިފައި ނުވާ ކަމަށް ރިޕޯޓުގައި ވެއެވެ.

އިންޑިއާއިން އޮސްކާސް އަށް "ލާޕަތާ ލޭޑީސް" ގެ ނަން ފޮނުވުމުން މީގެ ދުވަސްކޮޅެއް ކުރިން އެތައް ބަޔަކު ވަނީ އެކަމަށް ފާޑު ކިޔާފަައެވެ. އަދި މި ފިލްމަށް އޮސްކާސް އިން ޖާގަ ނުލިބުމުން އެކަމުގެ ސަބަބުން މީހާރު އިންޑިއާގެ ފިލްމު ފެޑެރޭޝަން އަށް އެތައް ބައެއްގެ ފާޑު ކިޔުން ވަނީ އަމާޒުވެފައެވެ.

މިފަހަރު އިންޑިއާއިން ފޮނުވި އެންޓްރީ އޮސްކާސް އިން ބަލައިނުގަތް ނަމަވެސް، އިންޑިއާގެ ސިނަމާއަށް ރަނގަޅު ހަބަރެއް ވަނީ ލިބިފައެވެ. ސަބަބަކީ އިނގިރޭސި ވިލާތުގައި އުފެއްދި ހިންދީ ފިލްމު "ސަންތޯޝް" އަށް ވަނީ އޮސްކާސް އިން ޖާގަ ލިބިފައެވެ. މިއީ އިނގިރޭސި ވިލާތުން އޮސްކާސް އަށް ފޮނުވި އެންޓްރީއެވެ. ސަންދިޔާ ސުރީ އުފެއްދި މި ފިލްމުގެ ލީޑު ތަރިންނަކީ އިންޑިއާގެ އެކްޓަރުން ޝަހާނާ ގޮސްވާމީ އާއި ސުނިތާ ރާޖްވާރު އެވެ.