"ޕުޝްޕާ 2" އެޅުވި ތިއޭޓަރުގައި ހިނގައިދިޔަ ހާދިޘާގެ ސަބަބުން އިއްޔެގެ ވަގުތެއްގައި ފިލްމުގެ ލީޑު ތަރި އައްލޫ އަރުޖުންގެ ގޭގެ ކައިރީގައި މުޒާހަރާކޮށް އެގެއަށްވެސް ގެއްލުން ދީފައިވާ ކަމަށް މީޑިއާތަކުން ރިޕޯޓު ކޮށްފިއެވެ.

ހިންދުސްތާން ޓައިމްސްގައިވާ ރިޕޯޓެއްގައި ބުނެފައިވަނީ އެމީހުން މުޒާހަރާ ކޮށްފައިވަނީ އެ ހާދިޘާގައި މަރުވި އަންހެން މީހާއަށް އެހީ ހޯދައިދިނުމުގެ ބޭނުމުގައި ކަމަށެވެ. އެގޮތުން އެމީހުން ގޮވަމުން ދިޔައީ އަންހެން މީހާގެ އާއިލާއަށް 1 ކަރޯރު ރުޕީސް ދިނުމަށް އެދި ކަމަށްވެސް ރިޕޯޓުގައި ވެއެވެ.

"އައްލޫ އަރުޖުން ޖެހޭނެ އެ އާއިލާއަށް ހަރަދު ކޮށް އެ އާއިލާއަށް ބަލަން. އެ އާއިލާއަށްޓަކާ އަޑު އުފުލަން ތިބޭނަން އައްލޫ އަރުޖުން މިކަމަށް އެއްބަސް ނުވާނަމަ" ނޫސްވެރިންނާ ވާހަކަ ދައްކަމުން މުޒާހަރާ ކުރަން ތިބި މީހުން ވަނީ ބުނެފައެވެ.

އެމީހުން ވަނީ ތަފާތު އެކި އެއްޗެހި އައްލޫ އަރުޖުންގެ ގެއަށް އުކައި އެގޭގައި ހުރި ބައެއް ސާމާނުވެސް ހަލާކު ކޮށްފައެވެ. ރިޕޯޓުގައި ބުނާ ގޮތުގައި މި ހާދިޘާ ހިނގާދިޔައިރު އައްލޫ އަރުޖުން ގޭގައި ހުރިކަމެއް ޔަގީން ނުކުރެވެއެވެ. އަދި އެމީހުން މުޒާހަރާ ކުރަން ފެށުމުން އައްލޫ އަރުޖުންގެ އާއިލާ މީހުން އެތަނުން ގެންގޮސްފައިވާ ކަމަށްވެސް ރިޕޯޓުގައި ވެއެވެ.

މި މައްސަލާގައި ހައިދްރަބާދުގެ ފުލުހުން ވަނީ 8 މީހަކު ހައްޔަރު ކޮށްފައެވެ. އަދި ފުލުހުން މިހާރު ދަނީ މިމައްސަލަ ތަހުގީގު ކުރަމުން ކަމަށް ރިޕޯޓުގައި ވެއެވެ.