އިންޑިއާގެ ވަރަށް ބާރުވެރި މީހެއްގެ އަންހެނުން އޭނާއަށް ފާރަލީކަމަށް ބޮލީވުޑްގެ މަޝްހޫރު ތަރި ވަރުން ދަވަން ބުނެފިއެވެ.

އޭނާ މިކަން ހިއްސާ ކޮށްފައިވަނީ އޭނާގެ ކުރިއަށް އޮތް ފިލްމު "ބޭބީ ޖޯން" ޕްރޮމޯޓު ކުރުމަށް ދިން އިންޓަވިއުއެއްގެ ތެރެއިންނެވެ. އެގޮތުން އޭނާ ބުނެފައިވަނީ އިންޑިއާގެ ވަރަށް ބާރުވެރި މީހެއްގެ އަނބިމީހާ އޭނާ އަށް ފާރަލައި އޭނާގެ ގެއާ ހަމައަށްވެސް ދިޔަކަމަށެވެ. އަދި އެ އަންހެން މީހާ އެހެން ކަންތައް ކޮށްފައިވަނީ އޭނާގެ ނަމުގައި ހަދާފައިވާ ފޭކު އެކައުންޓަކުން އެ އަންހެން މީހާ އާއި ވާހަކަ ދައްކައި ގުޅުން ބަދަހި ކުރުމުން ކަމަށްވެސް ވަރުން ވަނީ ބުނެފައެވެ.

"އެ އަންހެން މީހާއަކީ ވަރަށް ބާރުވެރި މީހެއްގެ އަންހެނުން. ކާކު ކަމެއް މިތާ ބުނެދެވޭކަށް ނެތް. އޭނާ އެހެން ކަންތައް ކުރީ މީހަކު އޭނާ އަށް ފޭކު އެކައުންޓަކުން "ކެޓްފިޝް" ކުރުމުން. އޭނާ އަހަރެންގެ ގެއަށްވެސް ދިޔަ، އޭނާ ހީކުރީ އަހަރެން އޭނާއަށްޓަކާ އާއިލާވެސް ދޫކުރާނެ ކަމަށް،" ވަރުން އިންޓަވިއުގައި ބުނެފައިވެއެވެ.

އަދި އެކަންތައް ބޮޑު ވެގެން ގޮސް ފުލުހައް ގުޅައި ފުލުހުންގެ އެހީ ހޯދަން ޖެހުނު ކަމަށްވެސް ވަރުން ވަނީ ބުނެފައެވެ. މި ވާހަކަަ އޭނާ ހިއްސާ ކޮށްފައިވަނީ ފިލްމީ ދާއިރާގައި މަސައްކަތް ކުރާއިރު ކުރިމަތިވާ ދަތިތައް ކިޔައިދެމުންނެވެ.

ވަރުންގެ ކުރިއަށް އޮތް ފިލްމު "ބޭބީ ޖޯން" ނެރެން ހަމަޖެހިފައިވަނީ މިމަހު 25 ގައެވެ. އެޓްލީ ޑައިރެކްޓު ކުރާ މި ފިލްމަކީ ތަލަޕަތީ ވިޖޭގެ "ތޭރީ" އަށް ބިނާކޮށް ހަދާފައިވާ ފިލްމެކެވެ. މި ފިލްމުގެ ކާސްޓުންގެ ތެރޭގައި ވަރުންގެ އިތުރުން ކީރުތީ ސުރޭޝު އާއި ވަމިކާ ގައްބީ އަދި ޖެކީ ޝްރޮފް ހިމެނެއެވެ.