މާލީ ވުޒާރާއިން ދައުލަތުގެ ހަރަދުތައް ހަމަޖެއްސުމަށް 1.6 ބިލިއަން ރުފިޔާގެ ޓްރެޝަރީ ބިލް (ޓީ ބިލް) ވިއްކުމަށް ހުޅުވާލައިފިއެވެ.

އެ ވުޒާރާއިން ހާމަކުރި ގޮތުގައި އެ ވުޒާރާއިން ވަނީ 28 ދުވަހުން އަނބުރާ ދެއްކުމަށް 276.6 މިލިއަން ރުފިޔާގެ ޓީ ބިލަކާއި، 98 ދުވަހުގެ ތެރޭގައި އަނބުރާ ދެއްކުމަށް 200 މިލިޔަން ރުފިޔާގެ ޓީ ބިލެއް ވިއްކަން ނިންމާފައެވެ.

182 ދުވަހުގެ ތެރޭގައި އަނބުރާ ދެއްކުމަށް 289 މިލިއަން ރުފިޔާގެ ޓީ ބިލެއްގެ އިތުރުން 364 ދުވަހުގެ ތެރޭގައި އަނބުރާ ދެެއްކުމަށް 843 މިލިއަން ރުފިޔާގެ ޓީ ބިލެއް ވިއްކުމަށްވެސް މާލީ ވުޒާރާއިން ވަނީ އިއުލާންކޮށްފައެވެ.

ސަރުކާރުން ވިއްކާ ޓީ ބިލްތައް އާންމުކޮށް ގަންނަނީ ޕެންޝަން ފަންޑުންނާއި ސަރުކާރު ހިއްސާވާ ބައެއް ކުންފުނިތަކުގެ އިތުރުން ބައެއް ބޭންކުތަކުންނެވެ. އަދި އަމިއްލަ ބައެއް ކުންފުނިތަކުންވެސް ޓީ ބިލް ގަންނަކަށް ފާހަގަ ކުރެވެއެވެ.

މިފަހަރު ސަރުކާރުން ވިއްކާ ޓީބިލްތަކުގެ އިންޓްރެސްޓް ރޭޓް އުޅެނީ 3.50 އިންސައްތައާއި 4.60 އިންސައްތައާއި ދެމެދުގައެވެ.

ޓީ-ބިލަކީ، ދައުލަތުގެ ބަޖެޓް ޑެފިސިޓް ފޫބެއްދުމަށް އާމްދަނީ ހޯދުމުގެ ގޮތުން ވަކި އިންޓަރެސްޓް ރޭޓެއްގައި، ފަހުން އަނބުރާ ފައިސާ ދައްކަން ޖެހޭ ގޮތަށް މަރުކަޒީ ބޭންކުން ވިއްކާ މާލީ އިންސްޓްރޫމަންޓެކެވެ. އެ ވުޒާރާއިން ބުނާގޮތުން ޓީ ބިލް ވިއްކަނީ ދައުލަތުގެ އާމްދަނީން ހަރަދުތައް ދެކޮޅު ނުޖެހި ސަރުކާރު ހިންގުމަށް އިތުރަށް ފައިސާ ބޭނުންވުމުން، ފައިސާ ޗާޕް ނުކޮށް އެކަން ކުރެވޭނެ ގޮތް ހެދުމަށެވެ.

ޓީބިލާއި ޓީބޮންޑުގެ މައުލޫމާތު މީގެ ކުރިން މަރުކަޒީ ބޭންކް (އެމްއެމްއޭ) އިން އާންމު ކުރަމުން ދިޔަ ނަމަވެސް 2021 ވަނަ އަހަރުން ފެށިގެން ޓީބިލް ވިއްކައި ތަފާސް ހިސާބުތައް ބެލެހެއްޓުން ވަނީ މާލީ ވުޒާރާގެ ދަށަށް ބަދަލު ކޮށްފައެވެ.