ބޮލީވުޑްގެ ބްލޮކްބަސްޓަރު ތަރި ސަލްމާނު ޚާންގެ ކުރިއަށް އޮތް ފިލްމު "ސިކަންދަރު" ގެ ޓީޒަރު މިއަދު ނެރޭނެއެވެ.

މީގެ ކުރިން މި ފިލްމުގެ ޓީޒަރު ނެރުމަށް ހަމަޖައްސާފައިވަނީ މި ޑިސެމްބަރު މަހުގެ 27 އެވެ. ނަމަވެސް އިންޑިއާގެ ކުރީގެ ބޮޑުވަޒީރު މަންމޯހަން ސިންގު ނިޔާވުމާ ގުޅިގެން އިޚްތިރާމް އަދާ ކުރުމުގެ ގޮތުން ޓީޒަރު ނެރުން ފަސް ކުރީ ކަމަށް ބޮލީވުޑް ހަންގާމާއިން ވަނީ ރިޕޯޓު ކޮށްފައެވެ.

80 ސިކުންތުގެ މި ޓީޒަރުގައި މީގެ ކުރިން ސަލްމާނު ފެނިފައި ނުވާ ގޮތަކަށް ފެންނާނެެ ކަމަށް ރިޕޯޓުތަކުގައި ވެއެވެ. މި ފިލްމު ޑައިރެކްޓު ކޮށްފައިވަނީ ސާޖިދު ނަޑިއަޑްވާލާ އެވެ. ފިލްމުގެ ޕްރޮޑަކްޝަން ޓީމުން ޓީޒަރު ނެރުން ފަސްކުރުމުންވެސް އިންޑިއާގެ ރައްޔިތުން މަންމޯހަން ސިންގުއަށް ކުރާ އިޚްތިރާމް އެނގެއެވެ.

92 އަހަރުގައި މަންމޯހަން ސިންގު ނިޔާވެފައިވަނީ މުސްކުޅި އުމުރުގެ ސަބަބުން ބަލި ހާލު ގޯސްވެގެން ކަމަށް ރިޕޯޓުތައް ބުނެއެވެ. މަންމޯހަން ސިންގު ވަނީ 2004 އިން 2014 އަށް އިންޑިއާގެ ބޮޑުވަޒީރުކަން ކުރައްވާފައެވެ.